قصة ليلى بقلم منال عباس حصرى لموقع جولد الاول

قصة ليلى بقلم منال عباس حصرى لموقع جولد

الاول

طردني مديري بسبب شكلي وبعد عشر سنين قابلته في أكبر منتدى أعمال في أمريكا وعملت حاجة خلت 500 شخص يلتزموا الصمت

اسمي ليلى وكان عندي وقتها ستة وعشرين سنة وكنت دايمًا مؤمنة إن الإنسان ممكن يخسر أي حاجة في حياته إلا اجتهاده لأنه الحاجة الوحيدة اللي بتفضل معاه مهما الأيام اتغيرت

كل يوم كنت بوصل الشركة قبل كل الموظفين بساعة كاملة

كنت بعشق لحظة ما أفتح الباب الإزاز قبل ما أي حد ييجي وأسمع صوت أجهزة الكمبيوتر وهي بتشتغل وريحة المكان الهادية اللي كانت بتحسسني إني داخلة معركة محدش شايفها غيري

كنت شغالة في قسم التحليل الاستراتيجي في واحدة من أكبر شركات الاستثمار

مكنتش صاحبة صوت عالي ولا لبس غالي ولا عندي واسطة ولا علاقات قوية

لكن كنت صاحبة أدق التقارير وأنجحها

ورغم كل ده كان فيه حاجة واحدة الناس كلها بتشوفها قبلي

شكلي

كنت طويلة جدًا ورفيعة بشكل لافت لدرجة إن شوية من زمايلي كانوا بيدوني ألقاب سخيفة ويضحكوا بين بعض وهم فاكرين إني مش سامعاهم

بس أنا كنت بسمع كل كلمة

واتعودت أدفن وجعي جوه شغلي

لأن الأرقام عمرها ما بتضحك على حد

والنجاح عمره ما سأل عن الشكل

أما مديري سامر فكان شايف الموضوع بطريقة تانية خالص

من أول يوم دخلت مكتبه علشان الإنترفيو بصلي من فوق لتحت وعقد دراعاته وقال

هو إنتي متأكدة إنك جاية للمقابلة الصح

ابتسمت وقلت

أيوه معايا شهادة في الاقتصاد وشهادة تانية في إدارة المخاطر وعندي خبرة عملية تلات سنين

ابتسم بسخرية وقال

كل الشهادات دي وبرضه مش هتعرفي تقنعي عميل واحد لأن الناس بتحب اللي شكله واثق مش اللي شكله كأنه مأكلش من أسبوع

بلعت الإهانة وقلت

أنا واثقة في شغلي وده كفاية

رد وهو بيمضي ورق التعيين

هنشوف

وافقت على الشغل لأني كنت محتاجاه جدًا

بابا كان طلع على المعاش من كام شهر وماما كانت تعبانة وأخويا الصغير لسه في الجامعة

وكنت عارفة إن المرتب ده هيغير حال بيتنا

وعشان كده استحملت كل حاجة

الأيام بدأت تعدي

كنت أول واحدة تدخل وآخر واحدة تخرج

كل مشروع صعب كان بينتهي على مكتبي

وكل ملف معقد كان بيوصل لي

وكل مرة أخلص شغل ييجي سامر ياخده ويعرضه في الاجتماعات كأنه هو اللي عمله

في الأول كنت فاكرة إنه بعد كده هينسبلي المجهود

بس ده عمره ما حصل

وفي يوم اكتشفت غلطة في عقد استثماري كانت هتكلف الشركة ملايين لو اتوقع

فضلت أراجع البنود لحد الفجر وبعدها بعت تقرير كامل

تاني يوم حضر كبار المساهمين

وقف سامر قدام الشاشة الكبيرة وابتدى يشرح التحليل كلمة كلمة

وأنا قاعدة في آخر القاعة بسمع الجمل اللي كتبتها بإيدي وهي طالعة من بقه كأنها أفكاره هو

أول ما خلص الناس سقفتله

والمدير التنفيذي سلم عليه وقال

إنت أحسن مدير اشتغل معانا من سنين

أما أنا فاكتفيت إني أبص في الورق اللي قدامي

وحسيت إني بقيت مش موجودة أصلًا

عدت شهور

وكل نجاح بعمله بيتحسب لسامر

وكل مرة أتكلم عن حقي يغير الكلام أو يقولي اصبري

لحد ما جه اليوم اللي قلب حياتي كلها

في ليلة كانت الدنيا فيها بتمطر كنت نسيت موبايلي على المكتب

رجعت آخده

وكانت الشركة ضلمة إلا نور مكتب سامر

قربت من غير قصد علشان أقوله إني ماشية

لكن سمعته بيتكلم في التليفون وبيضحك

قال بصوت واضح

متقلقش كل الأفكار اللي ليلى بتجيبها بقدمها باسمي زي كل مرة

دي شخصية ضعيفة ومش هتقدر تتكلم

وحتى لو اتكلمت محدش هيصدقها

وقفت مكاني وحسيت إن الأرض بتسحب من تحت رجلي

مكنتش مصدقة إن الراجل اللي استحملت إهاناته سنة كاملة بيعترف بكل ده بمنتهى البساطة

رجعت البيت الليلة دي ومغمضتش عيني دقيقة واحدة

وتاني يوم دخلت مكتبه

قلتله بهدوء

أنا عايزة أعرف ليه بتسرق شغلي

رفع راسه بالراحة وابتسم ابتسامة مستفزة وقال

ومين قال إنه شغلك

قلت

كل الملفات متسجلة باسمي وكل النسخ الأصلية معايا

ضحك وقال

وإنتي فاكرة إن ده هيفرق مع حد

وبعدين قرب مني وقال بصوت واطي

إنتي متنفعيش تبقي واجهة لشركة كبيرة

الشركات بتدور على ناس أول ما العميل يشوفهم يرتاح

أما إنتي فمكانك ورا الشاشة وبس

بصيتله شوية

وبعدين قلت

هييجي يوم تندم فيه على كل كلمة قولتهالي

ابتسم بسخرية وشاور على الباب وقال

اتفضلي تقدري تمشي

خرجت من مكتبه وأنا حاسة إن فيه حاجة كبيرة اتكسرت جوايا

لكن مكنتش أعرف إن الضربة الأكبر كانت مستنياني تاني يوم الصبح بقلم منال عباس
تاني يوم صحيت بدري كعادتي وكنت فاكرة إن اللي حصل بيني وبين سامر امبارح مجرد خناقة هتتحل بكلمتين أو حتى بتحقيق داخلي يثبت الحقيقة كنت داخلة الشركة وأنا ماسكة اللاب توب بتاعي وكوباية القهوة اللي بشربها كل صباح وحاسة إن النهارده هيكون بداية النهاية لكل الظلم اللي شوفته

وصلت عند بوابة الشركة وحطيت الكارت على جهاز الدخول

الجهاز نور أحمر

استغربت وجربت مرة تانية

برضه أحمر

بصيت للكارت وقربته أكتر

مفيش فايدة

في اللحظة دي جه فرد الأمن وكان باين عليه الإحراج وقاللي

آسف يا أستاذة ليلى الكارت بتاع حضرتك اتلغى

قولتله باستغراب

إزاي يعني اتلغى

رد وهو بيبص في الأرض

دي تعليمات من الإدارة

قولتله

مين في الإدارة

قال

الأستاذ سامر بنفسه

حسيت إن قلبي وقع

وقبل ما أتكلم لقيت موظف من الموارد البشرية نازل من الأسانسير وماسك كرتونة صغيرة

وقف قدامي وقال

دي حاجتك من المكتب

بصيت جوه الكرتونة

لقيت الكوباية اللي كنت بشرب فيها القهوة

دفتر الملاحظات اللي كنت بكتب فيه كل أفكاري

صورة ليا مع بابا وماما

وقلم كنت جايباه هدية لنفسي أول ما اتعينت

كل اللي بنيته في سنة كاملة اتحط في كرتونة صغيرة واترمى قدامي

قولتله

يعني إيه ده

هو أنا مرفودة

رد بسرعة كأنه حافظ الكلام

الشركة أنهت التعاقد مع حضرتك أثناء فترة الاختبار وده حق قانوني

قولت

ومن غير حتى ما حد يبلغني

قال

أنا مجرد بنفذ التعليمات

لف وسبني ومشي

وقفت قدام الشركة وأنا مش قادرة أستوعب اللي حصل

ناس داخلة وناس خارجة وكل واحد مشغول في حياته

ولا حد فيهم يعرف إن حياتي كلها انهارت في خمس دقايق

ركبت أول أتوبيس من غير حتى ما أعرف رايح فين

فضلت أبص من الشباك وأنا حضني للكرتونة كأنها آخر حاجة باقية ليا

رجعت البيت

ماما أول ما فتحت الباب ابتسمت وقالت

رجعتي بدري النهارده

ابتسمت بالعافية وقلت

آه خلصت بدري

مكنتش قادرة أكسر قلبها وأقولها الحقيقة وهي أصلا تعبانة

دخلت أوضتي وقفلت الباب

وساعتها لأول مرة انهرت

فضلت أعيط ساعات

مش علشان الشغل

لكن علشان الإهانة

علشان كل اللي تعبت فيه اتسرق

وكل اللي حلمت بيه اتحطم

وفي آخر اليوم فتحت اللاب توب وبعت أكتر من خمسين إيميل لشركات صغيرة أعرفها

كل الرسائل كانت تقريبًا نفس الكلام

أنا محللة مالية وعندي خبرة في تحسين الأداء وتقليل الخسائر ومستعدة أشتغل بأي أجر مناسب

عدى يوم

اتنين

تلاتة

ولا رد

كل شوية أفتح الإيميل يمكن ألاقي فرصة

لكن مفيش

فلوسي بدأت تخلص

اضطريت أبيع الساعة اللي بابا جابهالي يوم التخرج

وبعت شوية هدوم غالية كنت محتفظة بيها للمناسبات

ورغم كده الفلوس كانت بتخلص بسرعة

بعد أسبوع كامل رن تليفوني

كان رقم غريب

رديت بسرعة

لقيت راجل كبير في السن بيقولي

إنتي ليلى

قولتله

أيوه

قال

أنا صاحب شركة صغيرة للاستيراد والتصدير وصلني الإيميل بتاعك من واحد صاحبي وعندي مشكلة محدش عرف يحلها لو قدرتي تساعديني هعتبرها بداية شغل بينا

قلبي دق بسرعة

قولتله

أنا جاهزة أبدأ في أي وقت

قال

تعالي بكرة الساعة تسعة الصبح

قفلت المكالمة وأنا لأول مرة من أيام حسيت إن فيه نور صغير ظهر في آخر الطريق

مكنتش أعرف إن الفرصة دي هي اللي هتغير حياتي كلها وتكون أول خطوة في الرحلة اللي سامر نفسه عمره ما كان يتخيل إنها هتوصلني للمكان اللي هقف فيه قدامه من جديد يوماً ما وهو اللي هيبقى محتاج يسمع مني كلمة واحدة بس بقلم منال عباس
تاني يوم صحيت قبل المنبه من كتر التوتر لبست أبسط هدومي وخرجت بدري جدًا وأنا بدعي ربنا إن الفرصة دي متضيعش مني لأن معيش غيرها وصلت قدام الشركة قبل المعاد بنص ساعة وقعدت على كرسي في الاستقبال أراجع ملفاتي وأحاول أهدي نفسي

بعد شوية خرج راجل في أواخر الخمسينات وشه هادي وفيه هيبة كبيرة بصلي وقال

إنتي ليلى

وقفت بسرعة وقلت

أيوه يا فندم

ابتسم وقال

أنا عادل صاحب الشركة اتفضلي

دخلت وراه المكتب وقعد قدامي وقال

أنا مش هضيع وقتك عندي مشكلة محدش عرف يحلها وكل مكتب استشارات طلب مبلغ كبير وفي الآخر محدش وصل لحاجة

ناولني شوية ملفات وقال

دي حسابات الشركة آخر سنتين لو عرفتي تقولي فين المشكلة يبقى خير

خدت الملفات وبدأت أقلب فيها

في البداية كل حاجة كانت شكلها طبيعي

لكن بعد ساعة كاملة من المراجعة لقيت رقم بيتكرر بطريقة غريبة

طلبت كشوفات إضافية

استغرب لكنه جابهالي

فضلت أراجع لحد المغرب

وفجأة ابتسمت

رفع عادل راسه وقال

خير

قولتله

المشكلة مش في المبيعات

قال

أمال فين

قولت

في المخازن

استغرب جدًا وقال

إزاي

وريتله إن فيه شركة نقل بتطلع فواتير مضاعفة كل شهر وإن موظف المشتريات متفق معاهم من أكتر من سنة وإن الشركة بتدفع مبالغ زيادة من غير ما حد ياخد باله

سكت شوية وبعدين نادى المدير المالي

طلب منه يراجع الكلام

الراجل فضل يراجع أكتر من ساعتين

وفي الآخر دخل المكتب وشه متغير وقال

الكلام كله صح

وفيه خساير بالملايين

عادل قام من مكانه وبصلي وقال

أول مرة حد يكتشف المصيبة دي

مد إيده وسلم عليا وقال

من النهارده إنتي مستشارة الشركة

ابتسمت لأول مرة من أيام طويلة

لكن قولتله

يا فندم أنا لسه معنديش مكتب ولا شركة

ضحك وقال

يبقى اعملي واحدة

رجعت البيت وأنا طايرة من الفرحة

أول ما دخلت ماما بصتلي وقالت

وشك منور كده ليه

حضنتها وقلت

ربنا عوضني يا ماما

ومن أول أتعاب أخدتها سددت الإيجار المتأخر وجبت العلاج لماما ورجعت أشتري الساعة اللي كنت بعتها لكن البياع كان باعها لحد تاني

زعلت شوية

بس بعدها قولت لنفسي

الساعة راحت لكن الوقت لسه في إيدي

بعد أسبوعين عادل كلمني تاني وقال

فيه صاحب شركة أعرفه عنده مشكلة كبيرة وهبعتهولك

وافقت

والمشكلة اتحلت

وبعدها بعتلي عميل تالت

ورابع

وخلال شهور قليلة بقيت كل أسبوع أشتغل مع شركة جديدة

اسمي بدأ يتردد وسط أصحاب الشركات الصغيرة

وكل واحد كان بيحكي للتاني عن البنت اللي بتشوف الغلطة من أول نظرة

وفي يوم كنت قاعدة في كافيه براجع ملفات عميل جديد لقيت واحد وقف قدامي وقال

إنتي ليلى

رفعت عيني واستغربت

قال

أنا شريف كنت شغال معاكم في الشركة القديمة

ابتسمت وسلمت عليه

قعد قدامي وقال

أنا سمعت اللي حصلك

وسامر لحد النهارده بيقول للناس إنه هو سبب نجاح كل المشاريع اللي كنتي بتشتغلي عليها

ابتسمت بهدوء

وقولت

سيبه يقول اللي هو عايزه

بصلي باستغراب وقال

إنتي مش زعلانة

هزيت راسي وقلت

لأ

لأن اليوم اللي هيعرف فيه الحقيقة قرب جدًا

بس هو لسه ميعرفش إن أول ضربة هتوصله هتيجي من مكان عمره ما كان يتوقعه بقلم منال عباس
الأيام بعد كده جريت بسرعة غريبة وكل يوم كنت بصحى ألاقي عميل جديد بيكلمني أو حد جايلي بترشيح من عميل قديم واللي كان بيفرحني أكتر من الفلوس إن الناس بدأت تثق فيا من أول مقابلة ومبقاش حد بيبص لشكلي ولا لطولي ولا لأي حاجة غير النتيجة اللي بطلعها

بعد سنة كاملة كان عندي عدد من العملاء ثابت وكنت مأجرة مكتب صغير جدًا في عمارة قديمة فيه أوضة واحدة وترابيزة واتنين كراسي ولابتوب وطابعة مستعملة اشتريتها بالقسط

الناس كانت تدخل المكتب وتستغرب

واحد منهم قالي

هو ده مكتبك

ضحكت وقلت

أيوه

رد وقال

أنا كنت متوقع شركة كبيرة

قولتله

اصبر على النتيجة وبعدها احكم

وبالفعل بعد أسبوع رجع نفس العميل وهو بيضحك وقال

أنا وفرت معاكم في أسبوعين أكتر من اللي كنت بخسره في سنة كاملة

ومن يومها بقى يبعتلي كل معارفه

بعدها بكام شهر المكتب الصغير بقى ميكفيش

اضطريت أستأجر مكان أكبر

وجبت أول موظفة تشتغل معايا

اسمها مريم

كانت لسه متخرجة وكل الناس رافضاها لأنها هادية ومش بتعرف تتكلم كتير

أول ما شفتها افتكرت نفسي

سألتها

إنتي واثقة في شغلك

قالت وهي متوترة

جداً

قولتلها

يبقى الباقي كله هيتعلم

اشتغلت معايا وبقت من أنجح الناس في الفريق

وكنت كل ما أوظف حد جديد أقوله جملة واحدة

إحنا هنا محدش بيتقيم بشكله ولا لبسه ولا صوته

إحنا بنتقيم بعقولنا وبشغلنا

الجملة دي بقت قانون في الشركة

بعد تلات سنين بقى عندي فريق كامل

وفتحنا فرع جديد

وبعدين فرع تالت

وفي كل مرة كنت أقف أبص للمكان وأفتكر الكرتونة اللي خرجت بيها من شركة سامر

وأقول لنفسي

الحمد لله

وفي يوم جالي اتصال من عادل

قاللي

ليلى عندي ليكي مشروع كبير جدًا

قولتله

خير

قال

شركة ضخمة عايزة تعمل إعادة هيكلة كاملة ومحتاجين حد يراجع كل الإدارات

وافقت من غير تردد

ولما وصلت الشركة اكتشفت إن حجم المشاكل أكبر بكتير مما كنت متخيلة

قعدت أنا وفريقي شهرين كاملين شغالين ليل ونهار

مكناش بنروح بيوتنا غير ساعات قليلة

لكن في الآخر قدرنا نوفر للشركة ملايين وننقذها من خسائر كانت هتقفلها

بعد انتهاء المشروع رئيس مجلس الإدارة وقف قدام كل الموظفين وقال

النجاح ده سببه شخص واحد

وبص ناحيتي

وقال

الأستاذة ليلى

كل الناس سقفت

لكن اللي أثر فيا بجد إن رئيس الشركة قال قدام الكل

أول مرة أشوف حد ينسب الفضل لفريقه قبل نفسه

ابتسمت وقلت

لأن النجاح عمره ما بيتعمل بشخص واحد

بعد الاحتفال خرجت مع فريقي نتعشى

وأثناء ما كنا قاعدين رن تليفوني

كان رقم غريب

رديت

لقيت واحدة بتقول

مساء الخير يا أستاذة ليلى أنا من لجنة تنظيم مؤتمر المستثمرين الدوليين

عندنا ترشيح لحضرتك إنك تكوني واحدة من المتحدثين الرئيسيين في المؤتمر السنة دي

سكت ثواني من المفاجأة

وسألتها

هو المؤتمر اللي بيحضره أكبر رجال الأعمال من كل الدول

قالت

أيوه

وحضرتك من أصغر الشخصيات اللي حققت نجاح بالشكل ده وإحنا شايفين إن قصتك تستحق تتحكي

وافقت

وقفلت المكالمة

وبصيت لفريقي وأنا ببتسم

محدش كان يعرف إن المؤتمر ده هيكون بداية أكبر مفاجأة في حياتي

لأن في نفس اللحظة تقريبًا كان فيه شخص تاني وصلته دعوة لحضور نفس المؤتمر

وكان اسمه سامر

من غير ما يعرف إن القدر بيجهزله مقابلة مستحيل ينساها طول عمره…بقلم منال عباس يتبع