حماتى واخوات جوزى البنات بقلم منال عباس الاول حصرى لموقع جولد
حماتى واخوات جوزى البنات بقلم منال عباس
الاول
اسمي مريم وعندي خمسة وعشرين سنة
عمري ما كنت أتخيل إن اليوم اللي كنت مستنياه عشان أفرح بقرب ولادتي يبقى بداية أكبر كابوس في حياتي
كنت حامل في آخر السابع ودخلت في التامن وبطني كبرت وبقيت بعد الأيام واحدة واحدة وأنا كل حلمي أشوف بنتي بين إيديا وجوزي كريم كان في الأول بيعاملني كويس صحيح شخصيته هادية ومابيحبش الكلام الكتير لكن كنت فاكرة إن قلبه مليان حب ليا
كنا ساكنين في بيت عيلته بيت كبير وكل واحد ليه أوضته لكن كل حاجة فيه كانت ماشية بكلمة حماتي وأخواته البنات
من ساعة ما حملت وأنا حاسة إن نظرات أخواته اتغيرت ناحيتي خصوصا أخته الصغيرة سارة كانت كل شوية تشتكي إنها تعبانة وإن حد عاملها عمل وإن حياتها واقفة
وفي يوم جمعة صحيت على صوت كريم وهو بيلبس بسرعة
سألته رايح فين
قال وهو بيبص في الساعة
هجيب شيخ يقرأ قرآن على سارة يمكن ربنا يشفيها
هزيت راسي وقلتله ربنا يقومها بالسلامة
بعد أقل من ساعة رجع ومعاه راجل كبير في السن دقنه بيضا وماسك شنطة صغيرة ودخلوا كلهم أوضة أخواته وقفلت الباب
أنا فضلت في أوضتي لأن جسمي كان مرهق جدا
وفجأة وأنا قاعدة على السرير حسيت بضيق غريب في صدري
قلبي بقى يدق بسرعة
إيديا بتترعش
ودموعي نزلت من غير سبب
حاولت أقوم معرفتش
بعدها بدأت أسمع صوت الشيخ وهو بيقرأ قرآن بصوت عالي
كل آية كان جسمي ينتفض معاها بطريقة مخيفة
حاولت أستغفر وأقرأ معاه لكن لساني كان تقيل
وبعدين حسيت إني مش أنا
كنت بقول كلام ومش فاكرة بقوله ليه
وبقيت أصرخ وأعيط من غير ما أفهم مالي
في اللحظة دي الباب اتفتح ودخلت أخت كريم الكبيرة وهي شايلة إزازة فيها مية
رشت عليا المية وهي بتقول
اشربي دي بسرعة
أول ما لمست المية بقيت أرجع كل اللي في بطني
وحسيت بدوخة جامدة والدنيا اسودت قدامي
آخر حاجة فاكراها إني سمعت صوت صريخ حواليا
ولما فوقت لقيت نفسي نايمة على السرير وكريم واقف بعيد عني وشه كله غضب
بصلي ببرود وقال
قومي البسي هدومك
بصيتله باستغراب
ليه
قال
هتروحي بيت أبوكي كام يوم ترتاحي
قلتله وأنا مرعوبة
بس أنا تعبانة وعايزة أفضل جنبك
رد من غير ما يبصلي
هناك هيهتموا بيكي أكتر
حاولت أعرف السبب لكنه كان بيرد بكلمتين وبعدين يسكت
لبست هدومي وأنا حاسة إن في حاجة مستخبية عني
وصلني بيت أبويا ونزل الشنط ومشى بسرعة حتى مدخلش يسلم عليهم
فضلت مستنياه يتصل
اليوم عدى
وبعدين أسبوع
وبعدين أسبوعين
وأنا كل يوم أبعتله رسالة
عامل إيه
رد عليا
أنا كويس
ولما أقوله إمتى هتيجي تاخدني
مبيردش
بعدها اتصلت بيه عشرات المرات
كان يقفل الخط
أو يسيب الموبايل يرن من غير رد
وأبويا كان بيحاول يطمني ويقول
أكيد مضغوط في الشغل
لكن قلبي كان بيقولي إن الموضوع أكبر بكتير
عدى شهر
وبعدين شهر تاني
وأنا ولدت بنت جميلة شبه أبوها بشكل يخض
أول ما شلتها حضنتها وعيطت
كنت مستنية كريم يدخل عليا المستشفى ويفرح ببنته
لكن اليوم خلص
والليل خلص
ومحدش جه
حتى مكالمة تهنئة مجتش
وقتها لأول مرة حسيت إن حياتي كلها بتنهار وأنا مش فاهمة السبب الحقيقي
فضلت أبص لبنتي الصغيرة وأقول لنفسي
هو إيه اللي حصل في اليوم ده
وإيه السر اللي خلاه يرجع من الراجل اللي كان بيستنى ولادته لأول مرة لرجل غريب كأنه عمره ما عرفني أصلا
وفي ليلة بعد الولادة بشهرين رن تليفوني
كان كريم
رديت بسرعة وقلبي بيدق
لكن أول جملة قالها خلت الأرض تميد بيا
قال بصوت جامد
أنا عايز أطلقك بقلم منال عباس
رفعت التليفون من على ودني وأنا حاسة إن روحي خرجت مني
بصيت لبنتي اللي كانت نايمة جنبي وفضلت أعيط بصوت مكتوم عشان محدش يسمعني
أمي دخلت الأوضة أول ما شافتني بالحالة دي جريت عليا وقالت
في إيه يا مريم
حضنتها وأنا بترعش
كريم عايز يطلقني
أمي سكتت لحظة وكأنها مستوعبتش اللي سمعته
قالت
ليه
هزيت راسي
معرفش
فضلت طول الليل بفكر في كل لحظة عشتها معاه
أنا عمري ما خنته
ولا زعلته
ولا قصرت في حقه
يبقى ليه
تاني يوم أبويا مسك التليفون واتصل بيه
رد عليه بعد محاولات كتير
أبويا قاله بهدوء
يا ابني لو بنتي غلطت قولنا نعرف
لكن مينفعش تسيبها معلقة بالشهور
كريم قال بمنتهى البرود
أنا خلاص قررت
أبويا قال
طب السبب
رد
مش هينفع أقوله
وقفلت المكالمة
أبويا بصلي بعجز لأول مرة أشوفه في عينه
قال
في حاجة مستخبية يا بنتي
الكلام ده مش طبيعي
ومن يومها وأنا بقيت عايشة في دوامة
كل يوم أقوم على أمل إنه يتصل ويقولي حصل سوء تفاهم
لكن مفيش
كل يوم أبص على صورنا القديمة وأقول لنفسي
هو ده نفس الراجل اللي كان بيخاف عليا من الهوا
هو ده اللي كان بيقعد بالساعات يختار اسم بنتنا
إزاي بقى غريب بالشكل ده
بعد أسبوع مقدرتش أستحمل
اتصلت بيه
رد بعد رنة طويلة
قلتله وأنا بحاول أمسك دموعي
لو سمحت متسبنيش كده
قولي أنا عملت إيه
حتى لو هتطلقني من حقي أعرف السبب
سكت شوية
وبعدين قال
انتي عارفة عملتي إيه
قلت بسرعة
والله ما أعرف
قال بصوت كله احتقار
راجعي نفسك وتوبي لربنا يمكن يسامحك
حسيت إن قلبي وقف
قلتله
أنا عملت إيه
قال
انتي عارفة كويس
وقفل السكة
فضلت أبص للموبايل وأنا مش فاهمة أي حاجة
راجعت كل حاجة عملتها من أول جوازنا
مفيش
مفيش أي حاجة
بعدها بأيام اتصلت بيه تاني
المرة دي رديت عليه وأنا مصممة
قلتله
لو شايفني غلطانة واجهني
لكن متظلمنيش
قال بعصبية
مش هكرر كلامي
قلت
أنا مستعدة أعمل أي حاجة بس افهم
قال
خلاص
وسكت
بعدها بأسبوع وأنا قاعدة مع بنتي لوحدنا سمعنا خبط على الباب
فتحت
اتفاجئت بكريم واقف
كان أول مرة يشوف بنته
بص عليها دقيقة كاملة من غير ما يبتسم
ولا حتى يمد إيده يشيلها
أنا كنت مستنياه يحضنها
لكن فضل واقف مكانه
قلتله
اتفضل اقعد
دخل من غير كلمة
قعد على الكنبة وبص للبنت
قربت منه وقلت
عشان خاطري قولي أنا عملت إيه
فضل ساكت
كررت السؤال
برضه ساكت
في اللحظة دي أختي دخلت من المطبخ وشافته
قالتله
إيه يا كريم
ما تنطق
البنت بقالها شهور بتموت كل يوم
لو عندك كلمة قولها
بصلها بعصبية وقال
عايزين تعرفوا
قالت
أيوة
رد وهو بيبصلي مباشرة
أختك كانت بتشتغل بالسحر
الكلمة نزلت على دماغي زي الصاعقة
قمت من مكاني وأنا بصرخ
إنت بتقول إيه
أنا
أنا أعمل سحر
إزاي
قال بكل ثقة
الشيخ كشف كل حاجة
قلتله وأنا بعيط
أنا أصلا يومها ماكنتش واعية
أنا كنت تعبانة
قال
كنتي بترددي كلام غريب
قلت
أنا حتى مش فاكرة قولت إيه
قال
الشيخ كان بيقرأ على أختي وفجأة انتي بدأتي تتكلمي وتقولي بلاش يفك بلاش يفك وسيبوها زي ما هي
حسيت الأرض بتميل بيا
افتكرت اليوم
افتكرت إني فعلا كنت فاقدة الوعي
افتكرت إني كنت بتقيأ وبصرخ
لكن عمري ما افتكرت إني قولت أي كلمة
قلتله
مين قالك الكلام ده
قال
الشيخ بنفسه
قلت بسرعة
مستحيل
قال
براحتك
لكن أنا مصدق اللي سمعته
خرج وسابني واقفة مكاني وأنا حاسة إن حياتي كلها بتنهار
وأول ما الباب اتقفل وراه جريت على التليفون وفضلت أدور بأي طريقة على رقم الشيخ لأن جوايا إحساس واحد بس
إن السر كله عند الراجل ده وإن الحقيقة لسه محدش قالها كاملة بقلم منال عباس
فضلت طول الليل أحاول أوصل لرقم الشيخ
كل ما أسأل حد يقول معرفوش
لحد ما افتكرت واحد من جيران بيت حماتي كان واقف يومها لما الشيخ دخل
كلمته وبعد لف ودوران اداني الرقم
إيدي كانت بتترعش وأنا بطلبه
رد بعد رنتين
قلت بسرعة
السلام عليكم يا شيخ
أنا مريم مرات كريم
سكت ثواني وقال
أيوة يا بنتي
قلتله
لو سمحت أنا عايزة أسألك سؤال واحد
حضرتك قولت لجوزي إني بعمل سحر
اتفاجئت بسكوته
وبعدين قال
مين قالك الكلام ده
قلت
هو بنفسه
قال بصوت حازم
أنا عمري ما اتهمت حد بالسحر
ولا يجوز أصلا إني أقول الكلام ده من غير دليل
حسيت نفسي مش قادرة أتكلم
قلتله
يعني حضرتك مقولتلوش إني كنت بمنعك تفك حاجة
قال باستغراب
إيه الكلام ده
أنا فاكر اليوم كويس
انتي كنتي تعبانة جدا وكان واضح إنك حامل ومجهدة
وأغمي عليكي
لكن عمري ما قولت إنك بتتكلمي عن سحر ولا غيره
الدم جرى في عروقي تاني
قلتله
متأكد
قال
أقسم بالله متأكد
وقبل ما أقفل قال
نصيحة يا بنتي
حافظي على بيتك وحاولي تعرفي الحقيقة من جوزك لأن اسمي ميدخلش في ظلم حد
قفلت المكالمة وأنا أول مرة أحس إن في حد بيكدب
لكن مين
الشيخ
ولا كريم
بعد أقل من ساعة لقيت تليفوني بيرن
كان كريم
أول ما رديت صرخ في وشي
جبتي رقم الشيخ منين
اتخضيت
قلتله
إيه اللي عرفك إني كلمته
قال بعصبية
متجاوبيش
قولتي له إيه
قلت
سألته الحقيقة
سكت ثانية
وبعدين قال
أنا اللي قولت الكلام ده
قلت وأنا مش فاهمة
يعني إيه
قال
أنا اللي قولت إنك كنتي بتتكلمي
الشيخ مقالش
وقبل ما أسأله أكتر قفل في وشي
فضلت أبص للتليفون وأنا حاسة إن دماغي هتنفجر
إذا الشيخ مقالش
يبقى كريم ليه كدب
وليه نسب الكلام للشيخ
فضلت ألف في الأوضة وأنا براجع كل حاجة
في اليوم ده كريم دخل مع الشيخ أوضة أخواته وقفلوا الباب
وأنا كنت لوحدي
يعني مفيش حد سمعني غيرهم
ولو الشيخ بينفي
يبقى مين اخترع الحكاية
بعد أسبوع قلت لأبويا
لازم أروحله
أبويا حاول يمنعني
لكن كنت حاسة إني لو معرفتش الحقيقة هموت
ركبت أنا وأبويا وأختي وبنتي وروحنا محافظتهم
الطريق كله كنت بدعي ربنا يطلع كل ده سوء تفاهم
وصلنا قدام البيت
خبطنا الباب
مرة
واتنين
وتلاتة
سمعنا صوت ناس جوه
لكن محدش فتح
فضلنا واقفين أكتر من عشر دقايق
وفجأة لقيت كريم بيتصل
رديت بسرعة
قال بغضب
إنتي عند البيت
قلت
أيوة
قال
امشي من قدام البيت
قلت
مش همشي غير لما أفهم
قال
أنا مش عايز أشوفك ولا أشوف حد من أهلك
قلتله
طب افتح الباب واتكلم معايا
قال
مفيش كلام
وقفل
وقفت أبص للباب المقفول وأنا حاسة إن في حد واقف وراه بيراقبنا
وفجأة الستارة اتحركت بسرعة
ولمحت بعيني وش أخت كريم الكبيرة وهي مستخبية وبتبص علينا
أول ما عيوننا اتقابلت استخبت بسرعة
في اللحظة دي جالي إحساس غريب
إحساس إن السر الحقيقي مش عند كريم
ولا عند الشيخ
السر كله مستخبي جوه البيت ده وإن في حد بيتعمد يخليه يكرهني ويصدق عني أي حاجة مهما كانت مستحيلة بقلم منال عباس
رجعت بيت أبويا وأنا دماغي هتنفجر من التفكير
كل ما أحاول أربط الأحداث ألاقي حاجة ناقصة
الشيخ بينفي
وكريم مرة يقول الشيخ قال ومرة يقول هو اللي قال
وأهله رافضين يفتحوا الباب
يبقى الحقيقة فين
فضلت يومين مبخرجش من أوضتي
لحد ما تليفوني رن برقم غريب
رديت بحذر
لقيت صوت واحدة ست بتقول
إنتي مريم
قلت
أيوة
قالت
أنا مش هعرفك بنفسي دلوقتي
بس لازم تسمعيني للآخر
قلبي بدأ يدق بسرعة
قلت
حضرتك مين
قالت
اسكتي واسمعي
اليوم اللي الشيخ جه فيه البيت حصلت حاجة إنتي متعرفيهاش
اتسمرت مكاني
قلت بسرعة
إيه اللي حصل
قالت
أنا كنت موجودة
حسيت إن نفسي اتقطع
قلت
كملي
قالت
بعد ما أغمي عليكي الشيخ خرج من الأوضة وهو متضايق جدا وقال لكريم إن حالتك محتاجة دكتور لأن الحمل تعبك وإن اللي حصل ملوش علاقة بأي حاجة تانية
قلت وأنا مصدومة
وبعدين
قالت
بعدها أم كريم شدته على جنب ودخلوا أوضة لوحدهم
سمعتهم بيتكلموا
لكن مقدرتش أسمع كل الكلام
سمعت جملة واحدة بس
خليه يبعد عنها قبل ما تضيع أختك
فضلت ساكتة وأنا حاسة إن دقات قلبي هتطلع بره صدري
قلت
مين حضرتك
قالت
دلوقتي مينفعش تعرفي
بس خلي بالك من أخت كريم الكبيرة لأنها أكتر واحدة كانت مصممة إنك تخرجي من البيت
وقبل ما أتكلم كانت قفلت الخط
فضلت أبص للموبايل ومش قادرة أستوعب
جريت على أختي وحكيتلها كل كلمة
قالتلي
واضح إن في حد لعب في دماغ جوزك
قلت
بس ليه
أنا عملتلهم إيه
قالت
مش لازم تكوني عملتي حاجة
في ناس بتغير من غير سبب
الكلام فضل يلف في دماغي
وفجأة افتكرت حاجة كنت نسيها
قبل يوم الشيخ بأسبوع كنت معدية قدام أوضة أخوات كريم
وسمعت أخته الكبيرة بتقول
لو فضل متعلق بيها كده عمره ما هيبص لحد غيرها
وساعتها أول ما شافتني سكتت
أنا وقتها محطتش الموضوع في دماغي
لكن دلوقتي افتكرت كل حرف
بعدها بيومين لقيت رسالة على تليفوني من رقم مجهول
فتحتها
كان مكتوب فيها
لو عايزة تعرفي الحقيقة كلها شوفي التسجيل اللي على الفلاشة السودة اللي كانت في شنطة كريم يوم الجمعة
قريت الرسالة أكتر من عشر مرات
أنا عمري ما شفت فلاشة
ولا أعرف عنها أي حاجة
لكن اللي صدمني أكتر
إن بعد دقيقة واحدة الرسالة اختفت
والرقم بقى غير متاح
في نفس الليلة اتصل كريم لأول مرة من غير ما أتصل أنا
رديت بسرعة
قال بصوت هادي غريب أول مرة أسمعه بعد شهور
إنتي رحتي البيت ليه
قلت
عشان أفهم
قال
لو عرفتي الحقيقة هتكرهيني
قلت
أنا بالفعل اتظلمت
قال
في حاجات لو اتقالت هتبوظ بيوت ناس كتير
قلت
بيتي أنا اتخرب بالفعل
سكت شوية
وبعدين قال جملة خلت جسمي كله يقشعر
قال
مش كل اللي في بيتي كانوا عايزينك تعيشي معايا من أول يوم جوازنا وفي واحد فيهم عمل حاجة عمري ما توقعت إنه يعملها لكن لو عرفتي مين هو مش هتصدقي أبدا لأنه أكتر شخص كنتي واثقة فيه…..يتبع بقلم منال عباس