سلفتى روايات رولا
— «القضية مضمونة 100% يا مي. إيصال الأمانة يودي رؤوف في داهية فوراً، والقرض اللي حسام اتدبس فيه هنعمله دعوى إثبات صورية وتدليس ونلزم رؤوف يدفع أصله بفوائده. بس الشاطر اللي يعرف يربط الخيوط صح.»
أول خطوة عملناها كانت إنذار رسمي على يد محضر لرؤوف بضرورة سداد الـ 600 ألف جنيه خلال 15 يوم، وإلا رفع القضية جنائياً. وفي نفس الوقت، قفلنا أنا وحسام كل الحسابات المشتركة، وغيرنا أرقام سرية الفيزا، وعملت خطة ميزانية جديدة لبيتنا وحياة جنى.
خلال الأسبوعين دول، بيت رؤوف أتحول لساحة حرب.
ندى، اللي كانت فاكرة إنها ملكة الزمان عشان جابت “الولد”، اكتشفت إن الواقع أسود بكثير من أحلامها. حماتي عفاف نقلت كل أغراضها وشاشاتها وشنطها لبيت رؤوف في المقطم. بس المرة دي ما كانش في “مي” المطيعة اللي بتطبخ وتغسل وتنضف. عفاف بدأت تعامل ندى بنفس الأسلوب:
— «أنتِ قاعدة هانم والبيت يكركب؟ قومي أطبخي وحضري الأكل للولد ولأبو العيلة!»
ندى ما استحملتش 3 أيام! بدأت الخناقات بينها وبين رؤوف بصوت طالع للشارع. رؤوف اللي كان متعود على الفلوس السهلة من حسام، صحي على واقع مرير:
فاتورة الكهرباء والغاز بتوعه وبتوع أمه وأبوه.
مصاريف الأدوية والعلاج الشهري لـ طاهر وعفاف اللي كانت بتعدي 25 ألف جنيه.
أقساط ورسوم العمارة والمشتريات.
وفوق كل ده، جه الإنذار القضائي من المحكمة.
رؤوف اتجنن. اتصل بـ حسام وهو بيصرخ:
— «أنت بتسيب مراتك ترفع عليا قضية؟ أنت نسيت إني أخوك الصغير؟»
حسام رد عليه بنبرة لأول مرة أسمعها منه، هادية، قوية، ومفيهاش أي تردد:
— «أنا ما نسيتش إنك أخويا، بس أنت نسيت إن عندك ضمير لما أكلت شقايا وشقى مراتي 8 سنين. الفلوس ترجع، والقرض يتقفل، وإلا القاضي هو اللي يحكم بينا.»
حاولت عفاف تدخل، وأتصلت بـ حسام وهي بتعيط وبتمثل إن ضغطها مرتفع وست مريضة، بس حسام قالها كلمتين وبس:
— «اللي يستقوى على بنتي ويهين مراتي، ما يطلبش مني حنية. أنتِ اخترتي ابنك المفضل يا أمي، خليه يشيلك بقى.»
رؤوف اضطر يبيع المزرعة والأرض بتوع بنها بأقل من سعرهم الحقيقي عشان يلحق نفسه من السجن. دفع الـ 600 ألف جنيه للشركة والحساب بتاعي، واضطر يسدد القرض اللي باسم حسام بالكامل عشان يقفل القضية.
المبلغ اللي رجعلي (أكثر من مليون وثمانمائة ألف جنيه مع أصل القرض والديون) أخدته فوراً وحطيته في شهادات استثمار وحساب توفير مقفول باسم “جنى حسام”، عشان أضمن مستقبلها للجامعة وما بعدها.