هاجر والمدير

هاجر كانت بنت عندها سبعة وعشرين سنة، متخرجة من تجارة انجليزي بتقدير جيد جدا، وبتتكلم انجليزي كأنها مولودة برا، وشاطرة وبتعرف تعمل خمسين حاجة في نفس الوقت، بس الدنيا زي ما انتو عارفين مش بالشهادات، قعدت سنة كاملة بتدور على شغل وكل ما تروح انترفيو يقولولها هنبقى نكلمك ومحدش بيكلمها. لحد ما في يوم صاحبتها انهار بعتتلها لينك، شركة كبيرة جدا في التجمع الخامس، طالبين سكرتيرة خاصة لرئيس مجلس الإدارة، المرتب مغري جدا بس كاتبين شرط غريب، يفضل عدم وجود خبرة كبيرة وان السن صغير، هاجر استغربت بس قدمت وخلاص. راحت الانترفيو، الشركة كانت برج ازاز كله، والناس ماشية تتكلم بالهمس، دخلت مكتب الريسيبشن لقت واحدة ست كبيرة اسمها سيدة، مديرة شئون العاملين، ست شديدة كده ولبسها كله اسود في اسود ونضارتها على طرف مناخيرها، بصت لهاجر من فوق لتحت وقالت لها انتي هاجر؟ اقعدي. دخلت بعدها لرئيس مجلس الإدارة، اول ما شافته اتصدمت، شاب عنده بتاع تلاتة وتلاتين سنة، اسمه صلاح، لابس بدلة غالية جدا، وشكله حلو بس وشه بارد، بارد تلج، مبيبتسمش نهائي، بص للسي في بتاعها ثانيتين ورماه على المكتب وقالها بتعرفي تشتغلي تحت ضغط؟ قالتله اه، قالها بتعرفي تحفظي اسرار؟ قالتله طبعا، قالها بتعرفي متسأليش كتير؟ قالتله حاضر، قالها مبروك انتي اتقبلتي، تبدأي من بكرة الساعة سبعة ونص الصبح، التأخير مرفوض. هاجر خرجت وهي مش فاهمة هو ده انترفيو ولا تحقيق، بس كانت فرحانة انها اخيرا هتشتغل. من اول يوم فهمت ليه كاتبين مش عايزين خبرة، عشان مفيش حد بخبرة هيستحمل صلاح ده، الراجل كان متسلط بطريقة تخنق، كل حاجة لازم بالملي، القهوة لازم حرارتها كذا، الورق لازم مترتب بلون معين، الايميل لازم يتبعت في الثانية اللي قال عليها، لو اتأخرت دقيقة واحدة يقلب وشه ويبقى يوم اسود، وكان بيتكلم قليل جدا، كلامه كله اوامر، اعملي، هاتي، خدي، ابعتي، من غير لو سمحتي ولا شكرا. وكان عنده حركة غريبة جدا لاحظتها هاجر من تاني اسبوع، كل ما حد يقوله معلومة، كل ما يتفق على معاد، كل ما يسمع اسم حد جديد، يروح مطلع من جيب البدلة نوتة صغيرة جدا قد كف الايد، جلدها بني ومتبهدلة من كتر الاستعمال، ويفتحها ويكتب فيها بسرعة ويقفلها ويرجعها جيبه، مكنش بيسيبها على المكتب ابدا، دايما في جيبه. في الاول افتكرت انه منظم زيادة، بس بعد كده لاحظت حاجات اغرب، مرة كان عنده اجتماع مهم مع واحد اسمه اسماعيل بيه، شريك كبير في الشركة، وقبل الاجتماع بخمس دقايق سألها هو الاجتماع مع مين؟ وهي كانت لسه قايلاله الصبح ومأكدة عليه وكاتبهوله في الاجندة، ومرة تانية نده عليها وقالها انهار فين؟ انهار دي صاحبتي اللي كانت بتبعتلي شغل زمان وكانت بتعدي عليا في الشركة، هو شافها مرة واحدة بس، والمفروض انه مالهوش دعوة بيها، ازاي فاكر اسمها وناسي اسم شريكه؟ ومرة كان بيكلم حد في التليفون وبيقوله انا هعدي عليك بكرة الساعة خمسة في المهندسين، وبعد ما قفل سألها هو انا قلتله الساعة كام وفين؟ هاجر بدأت تقلق، هو الراجل ده عنده ايه؟ الفضول كان هياكلها، خصوصا انه كان بيعاملها وحش، يعني مش وحش بيشتم وكده، لا هو بارد، بيحسسها انها هوا، انها مش موجودة، فبقت عايزة تفهمه، عايزة تعرف ايه اللي في النوتة دي اللي مخلياه ماشي بيها زي الطفل الصغير اللي ماسك لعبته. جات الفرصة في يوم خميس، كان عندهم ايفنت كبير في الشركة وكان صلاح مشغول جدا ومتوتر، وكان عنده صداع فظيع، دخل مكتبه ياخد مسكن وقلع الجاكت بتاع البدلة وسابه على الكرسي وخرج بسرعة عشان يستقبل ناس مهمة، وهاجر دخلت المكتب عشان ترتب الورق اللي وقع على الارض، عينها جت على الجاكت، وجيب الجاكت منفوخ شوية، النوتة كانت هناك. قلبها بقى بيدق بسرعة جدا، بصت برا المكتب، مفيش حد، الباب مقفول، ايدها كانت بتترعش، هي عارفة ان ده غلط وانها مينفعش تمد ايدها على حاجة مش بتاعتها، بس الفضول كان اقوى منها بكتير، وقالت لنفسها انا هبص بصة واحدة بس وهرجعها مكانها، عايزة افهم هو ليه بارد كده. مدت ايدها وطلعت النوتة، كانت صغيرة ودافية من جيبه، فتحتها. اول صفحة كان مكتوب فيها بخط كبير ومرتب، انا صلاح، عندي 33 سنة، عندي مرض اسمه فقدان ذاكرة مؤقت بسبب حادثة من تلات سنين، بنسى الحاجات القريبة، لازم اسجل كل حاجة مهمة. هاجر اتصدمت، فضلت واقفة متنحة ومش مصدقة اللي بتقراه. قلبت الصفحة اللي بعدها، لقى جدول، الساعة 7 الصبح اصحى، اخد الدوا، الساعة 7 ونص قهوة من غير سكر، الساعة 8 اوصل الشركة، وهكذا، يومه كله مكتوب بالدقيقة. قلبت كمان صفحة، لقت اسامي، اسماعيل بيه، شريكي من عشر سنين، راجل طيب بس عصبي، متحاولش تعانده، سيدة، مديرة شئون العاملين، اشتغلت مع بابا الله يرحمه، اعتبرها زي ماما، بتحب الشغل المظبوط، اسلام، السواق بتاعي، عنده بنتين، واحدة عيانة، ابقى اسأله عليها كل يوم. قلبت صفحة كمان لقت صفحة مكتوب عليها، هاجر، البنت الجديدة، السكرتيرة، ذكية جدا وشاطرة، بس بتخاف مني، حاول متبقاش بارد معاها، ابتسم في وشها، هي بتتعب عشانك. هاجر عينيها دمعت غصب عنها، فضلت تقلب تقلب، لقت صفحة مكتوب فيها، لما تنسى انت فين، بص في الصفحة دي، انت في شركتك، شركة بابا اللي انت كبرتها، انت كويس، متخافش، كل حاجة هتبقى كويسة. وصفحة تانية، لما تحس انك تايه ومش فاكر حد، اقرا الاسامي دي وافتكر ان الناس دي بتحبك. وفجأة سمعت صوت الباب بيتفتح، صلاح دخل، شافها وهي ماسكة النوتة، وشه اتخطف، بقى ابيض زي الورقة، وجري عليها خد النوتة من ايدها بعنف، اول مرة تشوفه متوتر وخايف كده، قالها بصوت عالي، انتي بتعملي ايه؟ مين سمحلك تمسكي حاجتي؟ انتي ازاي تمدي ايدك على حاجتي؟ اطلعي برا. هاجر خرجت وهي بتعيط وبتترعش، دخلت الحمام وفضلت تعيط، حست انها اتكشفت وانها هتترفد وانها عملت مصيبة، وقعدت تقول لنفسها انا غبية، انا ليه عملت كده، ما كنت اسيبه في حاله. لمحة نيوز بعد ساعة لقت سيدة داخلة عليها في المكتب بتاعها برا، قالت لها الباشمهندس صلاح عايزك جوا، هاجر مسحت دموعها ودخلت وهي مرعوبة، لقت صلاح قاعد على الكرسي وحاطط وشه بين ايديه وشكله تعبان جدا، النوتة قدامه على المكتب، شاورلها تقعد، قعدت. سكت شوية وبعدين قالها، انتي قريتي ايه؟ قالتله بصوت واطي، قريت اول كام صفحة بس والله، انا اسفة، انا عارفة اني غلطت، بس كنت عايزة افهم انت ليه بتعمل كده، انا اسفة بجد. صلاح تنهد تنهيدة طويلة وقالها، من تلات سنين عملت حادثة كبيرة انا وبابا، بابا مات وانا دخلت في غيبوبة شهرين، لما فوقت بقيت بنسى، الدكاترة قالوا دي حالة مؤقتة وهتتحسن مع الوقت والعلاج، بس لحد ما اتحسن لازم اسجل كل حاجة، كل الناس فاكرة اني بارد ومتسلط، بس انا ببقى خايف انسى حاجة مهمة فببقى مركز بزيادة وببان بارد، وحتى النوتة دي، انا ببقى كاتب فيها حاجات عشان افكر نفسي ابقى كويس مع الناس، زي ما كتبت عنك. هاجر مكنتش عارفة تقول ايه، قالتله انا اسفة مرة تانية، انا مكنش قصدي اضايقك، قالها لا انا اللي اسف اني زعقتلك، ممكن نعمل اتفاق؟ قالتله اتفاق ايه؟ قالها النوتة دي محدش يعرف عنها حاجة غير سيدة واسلام السواق، وانتي دلوقتي بقيتي التالتة، ممكن تخليكي انتي ذاكرتي؟ يعني لو نسيت حاجة تفكريني من غير ما تحسسيني قدام الناس اني ناسي؟ هاجر ابتسمت لاول مرة من ساعة ما اشتغلت وقالتله طبعا موافقة. ومن اليوم ده كل حاجة اتغيرت، صلاح مبقاش بارد زي الاول، بقى بيحاول يبتسم، وبقى لما ينسى حاجة يبص لهاجر وهي تلمحله من بعيد، وهي بقت تساعده من غير ما تجرحه، تكتبله الملاحظات بخطها هي وتحطها قدامه كأنها شغل، ولو حد سأله عن حاجة وهو ناسي، هي تتدخل بذكاء وتقول، اه يا باشمهندس زي ما حضرتك قلتلي الصبح ان كذا كذا، فهو يفتكر ويكمل. وفي مرة كان عنده معاد دكتور مهم ونسي، هي اللي فكرته وبعتتله لوكيشن العيادة وكتبتله في ورقة، متنساش تاخد الدوا بعد الكشف. سيدة لاحظت التغيير ده وكانت مبسوطة جدا، وفي مرة قالت لهاجر، انتي عارفة يا هاجر انا بقالي عشرين سنة في الشركة دي، من ايام ابو صلاح الله يرحمه، واول مرة من بعد الحادثة اشوف صلاح بيضحك بجد من قلبه، كان يوم ما كنتي بتشرحيله حاجة على اللاب توب والقهوة اتدلقت عليكي وقعد يضحك وانتي اتضايقتي وبعدين ضحكتي معاه. هاجر وشها احمر، لانها فعلا بدأت تحس بحاجة غريبة ناحية صلاح، مش شفقة بس، لا حاجة اكبر، بقت تشوفه بني ادم تاني غير المدير البارد، بتشوفه واحد شايل حمل كبير لوحده وخايف يقع ومش عايز حد يشوف ضعفه. وفي يوم الشركة كانت عاملة حفلة صغيرة بمناسبة انهم كسبوا مناقصة كبيرة، وكل الناس كانت مبسوطة، وصلاح كان واقف بيخطب وبيشكر الناس، وفجأة بص لهاجر وسط الناس وقال، وانا بشكر اكتر واحدة تعبت معايا الفترة اللي فاتت، هاجر، من غيرها مكنتش هعرف اعمل حاجات كتير، شكرا يا هاجر. كل الناس سقفت وهاجر كانت هتموت من الكسوف. بعد الحفلة وهو مروح لقى هاجر لسه قاعدة بتخلص شغل، دخل عليها وقالها انتي لسه مخلصتيش؟ قالتله بخلص اخر ايميل، قالها طب انا هوصلك، قالتله لا شكرا هركب اوبر، قالها لا انا هوصلك، دي مش اوامر مدير، ده طلب. وهما في العربية، صلاح كان سايق بنفسه، قالها تصدقي ان النهاردة طول اليوم منسيتش حاجة خالص من غير ما ابص في النوتة؟ هاجر قالتله بجد؟ قالها اه، عشان كنتي جنبي، انتي بقيتي النوتة بتاعتي اللي بتمشي على رجلين. هاجر ضحكت وقالتله طب هتفضل محتاجني كتير بقى، قالها اتمنى افضل محتاجك طول العمر. وبعدها بشهر، صلاح عمل عملية صغيرة كان الدكاترة قايلين انها هتحسن الذاكرة عنده بنسبة كبيرة، وهاجر فضلت معاه طول فترة العملية هي وسيدة واسلام، ولما فاق من البنج اول حد شافه كانت هاجر، واول حاجة قالها، انتي هاجر صح؟ السكرتيرة الشاطرة اللي بقت ذاكرتي؟ قالتله بعيون مليانة دموع، اه انا هاجر، وانت صلاح، رئيس الشركة البارد اللي مبقاش بارد خلاص. ومن ساعتها صلاح بقى احسن كتير، ذاكرته اتحسنت وبقى يفتكر حاجات كتير لوحده، بس فضل محتفظ بالنوتة الصغيرة، بس بقى بيكتب فيها حاجات تانية خالص، مرة هاجر لمحتها مفتوحة على مكتبه وكان مكتوب فيها، النهاردة هاجر لبست فستان ازرق شكله حلو عليها، ابقى قولها، ومكتوب كمان، متنساش تجيب شوكولاتة لهاجر عشان بتحبها. هاجر فهمت ساعتها ان في ناس ذاكرتها بتخونها بس قلبها عمره ما بيخون، وان احيانا اقوى نوتة ممكن تسجل عليها حياتك مش بتبقى ورق وجلد، بتبقى بني ادم بيحبك وبيخاف عليك وبيبقى جنبك حتى وانت ناسي نفسك.

مقالات ذات صلة

طفل رضيع

أكلة سمك زهرة الربيع

جوز امى انجى الخطيب

قصة ادم

بعد دقائق من طلاقى

رواية ذئب يوسف بقلم ذكيه محمد الثالث

اترك تعليقاً إلغاء الرد