كسرت نضارتى
حصري لصفحة روايات رولا
“أختي كسرت نظارتي الصبح في اليوم اللي هدافع فيه عن رسالة الدكتوراه. ضحكت وقالتلي: ‘شكل كده مالكش نصيب وتفشل.’ أمي رمتلي بكرة سيلوتيب وقالت: ‘صلحها بنفسك.’ وأبويا قال: ‘خلاص هما بدأوا مناقشة من غيرك.’ ماناكشتش معاهم. بعدها بـ 10 دقائق، الدكتور المشرف عليا كان بيرزع على باب الشقة… وماكانش لوحده.
أختي كسرت نظارتي الساعة 8:07 الصبح، في اليوم اللي مفروض أدافع فيه عن أبحاث 5 سنين تعب. وقفت تبتسم وهي باصة على حتت النظارة المكسورة في حوض المطبخ وقالت: ‘شكل كده مالكش نصيب وتفشل.’
لثانية واحدة، محدش أتحرك من مكانه.
أمي كانت بتبتسم وهي بتدهن المربى على التوست. أبويا كان مأنتخ وبيقلب في تليفونه. وأختي ‘نهى’ كانت ساندة على الرخامة بالروب الحرير بتاعها، وشكلها مبسوطة من اللي عملته.
أنشهدت في الفريم المكسور اللي في إيدي. من غير النظارة، أي حاجة أبعد من متر قدامي بتبقى عبارة عن زغشلة وألوان سايحة في بعض.
أمي فتحت الدرج، طلعت بكرة سيلوتيب رمادي، وزقتها ناحيتي.
‘صلحها بنفسك.’
أبويا بص في الساعة وقال: ‘خلاص هما بدأوا مناقشة من غيرك.’
وهو ده كان الملعوب كله.
بقالي شهور ونهى هتموت وتفرقع إن بحث الدكتوراه بتاعي عامل ضجة وجاذب الانتباه. أنا كنت مطلع نموذج أشعة تشخيصي بتكلفة قليلة، يقدر يلقط مشاكل شبكية العين باستخدام أجهزة موجودة أصلاً في المستشفيات. الموضوع ماكانش فلاشي ومبهر، بس كان شغال وبيجيب من الآخر. وكان في مجموعتين مستشفيات كبيرة في القاهرة بيتكلموا عشان يطبقوا البرنامج، والمشرف بتاعي، دكتور ‘أحمد شاكر’، كان محذرني وقال لي: ‘أقفل على أوراقك وأبحاثك بالضبة والمفتاح لحد ما تعدي المناقشة.’
نهى عمرها ما اهتمت بشغلي، لحد ما عرفت إن في شركة تكنولوجيا طبية كبيرة احتمال تشتري حقوق الاختراع.
ومن ساعتها وبدأت تسأل أسئلة غريبة.
‘هو الموضوع ده ممكن يعمل كام؟’
‘مين اللي هيملك براءة الاختراع؟’
‘مش هتناب أخواتك وحبايبك حاجة؟’
من أسبوعين، دخلت أوضتي ولقيت درج المكتب مفتوح ومتقلب.
ومن يومها، ما بقتش أسيب أي حاجة مهمة في البيت.
مسكت بكرة السيلوتيب بس ما استخدمتهاش.
نهى ضحكت وقالت: ‘إيه؟ كبريائك يمنعك؟’
رديت عليها: ‘لا… بفكر بس.’
هي افتكرت الهدوء ده استسلام. كلهم افتكروا كده.
أبويا قام وقال: ‘كلم الكلية واعتذرلهم، يمكن يرضوا يحددولك ميعاد تاني الترم الجاي.’
نهى قالت بفرحة وشماتة: ‘الترم الجاي؟ والله كتر خيرهم أوي.’