سكريبت يوميات اهلاوى وزملكاويه بقلم منال عباس الثاني والاخير

بعد شهور من الكلام والضحك والغيرة الخفيفة…

💍 وجه يوم القرار
عبد الرحمن أخد قرار.
قالها في مكالمة:
“أنا مش عايز أفضل أنافسك…
أنا عايز أكسبك.”
سكتت.
قال بهدوء:
“هجيلكم البيت الأسبوع الجاي.”
قلبها فضل يدق لحد ما خلصت المكالمة.
وفعلا وفى بوعده وحضر هو وأسرته

🎉 يوم الخطوبة… يوم القمة العائلية
البيت متزين…
بس المشكلة؟
أهل جمانة كلهم زملكاوية 😅
وأهل عبد الرحمن أهلاوية للنخاع!
😂ومن هنا هنشوف أول أزمة
اخو جمانة زياد دخل شايل علبة حلويات ومغلفها بورق أبيض.
واخو عبد الرحمن احمد بص وقال:
“ليه مش أحمر؟”
رد زياد :
“عشان الخطوبة بيضا… مش خسرانة!”
الجو سخن شوية 😂
وياريت الموقف خلص على كدا
😂 الكارثة الكبرى
واحد من قرايب عبد الرحمن شغل أغنية احتفال للأهلي على الفون بتاعه
راح اياد اخو جمانة راح مطلع موبايله وشغل أغنية للزمالك أعلى صوت!
الصالة بقت حفلة تشجيع مش خطوبة 😭
أم جمانة انا ( منال عباس ) حاولت تهدي الوضع وقالت:
“يا جماعة إحنا متجمعين علشان نفرح العيال!”
ردت والدة عبد الرحمن ( امال )بضحك وهزار علشان تلطف الجو
“ما إحنا فرحانين… بس من غير ما نغير مبادئنا!” والكل ضحك وفى عز الفوضى
😳
وجمانة وعبد الرحمن واقفين جنب بعض.
جمانة همست:
“إحنا شكلنا داخلين على دوري طويل.”
ابتسم وقال:
“طول ما إحنا في فريق واحد… مفيش خوف.”
ومسك إيدها قدام الكل.
سكتوا لحظة.
أبوها الجميل ( عماد الدين ) حب يحط لمسته الزملكاوي عليه وقال:
“بص يا ابني… بنتي زملكاوية من وهي صغيرة.”
عبد الرحمن رد بثقة:
“وهتفضل زملكاوية… وأنا هفضل أهلاوي…
بس بيتنا هيبقى فيه لونين… وأولادنا يختاروا براحتهم.” واحد من العيال الصغيرة
“هيبقى حكم!” 😂⚽

أكد على كلامه والده المحترم (سامى) : ومش بس هتفضل زملكاويه هتبقي بنتنا وفى قلوبنا
الكل ضحك.فى جو جميل ومريح وتفاهم

مرت الايام عليهم ماكنتش خاليه من المشاحنات كأهلاوى وزملكازيه بس برضو الحب بينهم بيزيد

وجه يوم 📜😂 اتفاق ما قبل الزواج
بعد الخطوبة بأسبوع…
قعدوا في كافيه هادي يتكلموا بجد شوية.
جمانة قالت وهي شادة وشها: “بص يا عبد الرحمن… لازم نحط قوانين.”
قال وهو رافع حاجبه: “هو إحنا فاتحين اتحاد كورة؟”
قالت بثقة: “أيوه… اتحاد البيت!”
📌 البند الأول
“مفيش حد يشمت في التاني بعد أي ماتش بين
نادي الزمالك
و
النادي الأهلي.”
عبد الرحمن قال: “طب ولو كسبت بخمسة؟”
ردت بسرعة: “تقول الحمد لله وتسكت.”
قال:
“طب ولو أنتي كسبتي؟”
ابتسمت: “هحاول أفتكر البند الأول.”😄😄😄
📌 البند التاني
“يوم القمة… كل واحد يتفرج لوحده.”
اتخض: “إزاي يعني؟!”
قالت: “عشان منطلقش بعض في نص الماتش.”
فكر شوية وقال: “طب نتفرج مع بعض… بس اللي يتعصب يقوم يعمل فشار.”
ضحكت: “يعني هنخلص ٣ أكياس فشار في الشوط الأول!”
📌 البند التالت (الأخطر)
عبد الرحمن قال بخبث: “أول طفل لينا… أختار أنا فريقه.”
جمانة خبطت الترابيزة: “مستحيل!”
قال: “طب نقلب عملة؟”
قالت: “لا… الطفل يلبس تيشيرت أبيض × أحمر!”
سكت لحظة وبص لها: “هو إحنا هنجيب طفل ولا علم دولة؟” 😂

بعد الضحك والهزار…

جات 💍 اللحظة الحلوة
قرب منها وقال بهدوء:
“عارفة؟
أنا عمري ما كنت متخيل إني هحب واحدة مختلفة عني للدرجة دي…
بس يمكن الاختلاف ده هو اللي خلاني أحبك.”
جمانة بصتله بعين لامعة:
“وأنا عمري ما كنت متخيلة إني هتجوز أهلاوي…
بس واضح إن قلبي ملوش انتماء غير ليك.”
سكتوا لحظة…
قال فجأة: “طب نحط بند أخير.”
قالت: “إيه؟”
قال: “في أي خناقة بينا… الفريق اللي يكسب القمة هو اللي يبدأ يصالح.”
ضحكت وقالت: “يبقى هتتصالح معايا كتير أوي.”
رد بثقة: “استني الدوري بس.” 😏🔥
انا بقول كفايه على كدا خطوبه ونكلم اهلنا والاسبوع الجاى تبقي الدخلة ❤️❤️❤️

👰🏻‍♀️🤵🏻 ليلة الفرح…كانت قمة جديدة!
القاعة متزينة أبيض ودهبي…
بس فجأة اتحولت ترابيزات عليها شرايط حمرا، وترابيزات تانية عليها شرايط بيضا 😭
أهل جمانة (الزملكاوية) قاعدين ناحية.
أهل عبد الرحمن (الأهلاوية) ناحية تانية.
وكأننا في مدرجات
استاد القاهرة الدولي
مش في قاعة أفراح! بقلم منال عباس
ومن هنا بدأت المواقف بين العائلتين 🫣🫣🫣
😂 الموقف الأول: الزفة الكارثية
الـ DJ سأل:
“نشغل إيه؟”
احمد اخو عبد الرحمن قال بكل ثقة
“أغنية احتفال
النادي الأهلي!”
زياد اخو جمانة رد فورًا:
“لا شغل حاجة تخص
نادي الزمالك!”
الـ DJ اتلخبط…
وقام مشغل الاتنين ورا بعض!
القاعة بقت نصها بيزغرد… والنص التاني بيصفّر 😂
😂 الموقف التاني: التورتة المشبوهة
لما جابوا التورتة…
كانت متقسمة نصين!
نص أحمر × نص أبيض 😭
احمد اخو عبد الرحمن قال:
“أكيد الأحمر هو الجزء الأكبر.”
رد اياد اخو جمانة وهو بيقيس بعينه:
“واضح إن الأبيض أطول!”
الاتنين قربوا يقيسوا بالمتر!
تسنيم اخت جمانه الصغرى قربت من جمانه وعبد الرحمن و همست ليهم بضحك
“ياريت تجروا وتهربوا ؟”
رد عبد الرحمن :
“لو جرينا دلوقتي… هيقولوا الأهلي انسحب.” 😭

😂 الموقف التالت: المعازيم الصغيرين
واحد طفل من قرايب عبد الرحمن لبس تيشيرت أحمر.
طفل تاني من قرايب جمانة شدّه وقاله:
“غيره عشان تتصور مع العروسة!”
الطفل رد بثقة:
“أنا جي أصالح مش أغير فريقي!” 😂
الناس كلها ضحكت.
😂 الكارثة الكبرى
في نص الرقص…
واحد شغل هتاف جماعي!
المدعوين بدأوا يردوا عليه!
العريس والعروسة واقفين في النص…
والقاعة بقت مدرج رسمي 😭⚽
❤️ اللحظة اللي سكّتت الكل
عبد الرحمن فجأة مسك المايك.بقلم منال عباس
قال:
“يا جماعة…
إحنا مختلفين في الكورة…
بس النهارده فريقين بقوا عيلة واحدة.”
جمانة خدت المايك وقالت بخفة دم:
“واللي مش عاجبه… يستنى ماتش الإعادة بعد شهر العسل!” 😏
الكل ضحك… وصفق.
وبدأوا يرقصوا هما الاتنين سوا…
ولا أحمر ولا أبيض…
بس حب ❤️

تمت
ملحوظه دى اسرتى اللى بحبها والعائلة كبرت بوجود عائلة عبد الرحمن زوج بنتى وهنفضل زملكاويه واهلاويه بس الحب والاحترام بينا ….
انتظرونا قريبا فى الجزء الثاني يوميات جمانه وعبد الرحمن بعد الزواج…..تمت ❤️😍😍