زعيم المافيا حكايات ميراا
وصوت نادين ملأ القصر.
“لو لقيتوا الزرار… يبقى الخطة ماشية زي ما كنت متوقعة.”
عمر صرخ:
— إنتِ فين؟!
ضحكت.
“مش مهم أنا فين… المهم تبص وراك.”
كلنا لفينا في نفس اللحظة.
آخر الممر…
كان واقف طفل صغير.
لابس بيجامة آدم.
لكن أول ما قربنا…
اكتشفنا إنه مجرد دمية بالحجم الطبيعي.
وفي حضنها…
ظرف أسود.
عمر فتحه بسرعة.
جواه صورة.
مجرد صورة واحدة.
أول ما شافها…
إيده بدأت ترتعش.
خطفتها من إيده بدون ما أفكر.
واتصدمت.
الصورة كانت لعمر…
واقف جنب نادين…
وبينهم طفل رضيع.
لكن الطفل…
ماكانش آدم.
كان طفل تاني.
وخلف الصورة مكتوب بخط أحمر:
“إنت لسه فاكر إن عندك ابن واحد؟”
الصمت سيطر على المكان.
أنا بصيت لعمر.
— يعني إيه الكلام ده؟
عمر ما ردش.
كان وشه شاحب كأنه شاف شبح.
لكن كبير الخدم همس بصوت مرتعش:
— مستحيل… السر ده ماكانش يعرفه غير تلاتة.
— مين؟ سأل عمر.
رد بصعوبة:
— حضرتك… ومدام نادين… والدكتور اللي ولّدها.
كل الأنظار راحت للدكتور.
اتراجع خطوة للخلف.
— أنا… أنا معنديش علاقة.
لكن قبل ما يكمل…
رن موبايله.
بص للشاشة…
وفجأة حاول يقفل المكالمة بسرعة.
عمر خطف الموبايل من إيده.
اسم المتصل كان ظاهر بوضوح…
“نادين”.
وفي اللحظة اللي عمر ضغط على زر الرد…
جاله تسجيل صوتي بدل المكالمة.
صوت نادين كان هادئًا جدًا وهي بتقول:
“لو الدكتور لسه واقف قدامك… يبقى متخليش حد يقرب منه… لأنه الوحيد اللي يعرف فين أخبيت آدم الحقيقي.”الكلمات وقعت على الأوضة كأنها رصاصة.
كل العيون اتثبتت على الدكتور.
اتراجع خطوة… ثم خطوة تانية.
وقال وهو بيهز راسه بعنف:
— دي بتكدب… والله العظيم بتكدب!
عمر ما قالش ولا كلمة.
لكن سحب المس*دس من جرابه مرة تانية.
ومشى ناحيته ببطء.
— بص في عيني… وقولي إنك عمرك ما خبيت عني حاجة.
الدكتور كان بيعرق بشكل واضح.
— أنا أنقذت ابنك… كنت بعالجه ليل نهار.
— سألتك سؤال واحد.
سكت.
الثواني كانت بتمر ببطء.
وفجأة…
انهار.
وقع على ركبته وقال:
— أنا غلطت… بس ماكنش قدامي اختيار!
الحراس هجموا عليه في لحظة.
عمر صرخ:
— محدش يلمسه… خلوه يتكلم.
الدكتور أخد نفس طويل وقال بصوت متقطع:
— يوم ولادة نادين… حصلت حاجة محدش يعرفها.
