كنزى لابسه نضارة

كنزي عندها صاحبتين من زمان، هاجر وسندس، هاجر دكتورة اسنان ومتجوزة ومخلفة، وسندس لسه سنجل وبتشتغل في شركة اعلانات، اول ما حكت لهم في جروب الواتساب، سندس قالت لها يا لهوي ده انتقام القدر، لازم تربيه، وهاجر قالت لها يا بت اهدي بقى، الراجل بقى ظابط محترم واكيد اتغير، كنزي قالت لا، انا عمري ما نسيت لما خد مني خمسة جنيه كنت محوشاها عشان اجيب عروسة باربي، وفضلت اعيط اسبوع.

تاني يوم كنزي بقت تعدي من نفس طريق الكمين كل يوم، اول يوم ما لقتوش، تاني يوم لقتوه، كانت لابسة فستان قصير شوية وحاطة برفان يقلب الدنيا، وقفت قبل الكمين ونزلت تتمشى كأن العربية عطلانة، شادي شافها وجري عليها، قالها مالك؟ محتاجة مساعدة؟ قالت له اه العربية سخنت ومش عارفة اعمل ايه، وهو طبعا عمل فيها عنتر زمانه، فتح الكبوت وهو مش فاهم حاجة وفضل يهوي عليه، وهي واقفة قدامه بدلال وتقوله ياااه انت لسه شهم زي زمان، فاكر لما كنت بتضرب الواد اللي زقني في المدرسة؟ هي بتكدب طبعا، عمره ما ضرب حد عشانها، كان بيضربها هي.

شادي صدق نفسه واتنفخ، قالها طبعا، انا طول عمري بحميكي، كنزي من جواها عايزة ترجع، بس برا بتضحك ضحكة مايصة وتقوله بجد؟ طب ما كنت بتحميني منك انت كمان ولا ايه؟ قالها يا ساتر، انتي قلبك اسود اوي، بقولك كنا عيال. من اليوم ده بقى شادي يستناها، وهي بقت تروح وتيجي وتدلع، تبعت له صورها بالفستان الجديد وتقوله ايه رايك؟ وتعمل فيديوهات تيك توك قدام الكمين وهو واقف وراها بيضحك، المتابعين بتوعها بقوا يسموه الظابط الوسيم، وهو طار من الفرحة، بقى يهتم بنفسه اكتر، يحلق دقنه كل يوم ويحط برفان غالي.

في يوم سندس قالت لها انتي بتلعبي بالنار يا كنزي، الواد شكله وقع بجد، كنزي قالت لها وانا عايزة كده، عايزاه يحبني بجد وبعدين اسيبه زي ما كان بيسيبني اعيط في الشارع، سندس قالت لها حرام عليكي، ده شكله غلبان، كنزي قالت لا مش غلبان، ده لسه جواه نفس الواد الرخم. بعد اسبوعين شادي عزمها على قهوة بعد الشغل، راحوا كافيه شيك في الشيخ زايد، كنزي كانت لابسة حاجة تخللي اي راجل يلف وشه، وشادي كان قاعد مش عارف يبص فين، قالها بصراحة يا كنزي انتي اتغيرتي اوي، بقيتي واحدة تانية، انا طول عمري فاكرك البت اللي بضفاير، بس دلوقتي انتي ست بجد، كنزي قالت له وانت لسه شايفني بتاعة ابتدائي؟ قالها لا والله، انتي دلوقتي بتاعة عمري كله.