سيليا بين الماضى والحاضر بقلم الكاتبه منال عباس الاول
فى المستشفى
خالد : حمدالله على السلامه يا بطل
زين وهو يفتح عينيه ببطئ ويتحدث بصوت خافت : انا فين
خالد : انت فى المستشفى والحمد لله انك قومت بالسلامه
زين بفزع : طب والعصابة ؟
خالد : اطمن العمليه نجحت وقبضنا على العصابه متلبسين ..ومعاهم البضاعه …بس للاسف ماقدرناش نعرف البيج بوص …استجوبناهم ومحدش يعرف اى معلومات عنه …
يلا شد حيلك وزى ما جهزت لعمليه النهارده وقدرنا نقبض عليهم …فكر ازاى نوصل للبيج بوص …
زين : فى حد تانى أنصاب
خالد : اه كام عسكرى وكام واحد من العصابه …بس انت الوحيد اللى إصابتك كانت خطيرة …لحد دلوقتي ..ما قدرناش نوصل لل صوب عليك الرصاص..
زين : حد بلغ والدتى ؟
خالد : الحقيقه ما رضيناش لحد ما تتحسن ..حرام طنط سميحة تعبانه دا غير أنها فى اسكندريه وعلى ما تيجى طنطا …هتاخد وقت
زين بفزع : طنطا !! ايه اللى جابنى هنا
احنا مش كنا فى كفر الزيات
خالد : ايوا فعلا بس حالتك كانت صعبه وخوفنا عليكم قولنا الافضل ننقلكم طنطا انت والعساكر .. وخصوصا اننا ما قبضناش على الرأس الكبيرة وما نعرفش ممكن يكون مرتب لايه فى مستشفى كفر الزيات …
يدخل الطبيب النوبتشى
الطبيب : كفايه كدا على المريض …المريض لسه محتاج راحة
خالد : اكيد …ونظر إلى زين …هجيلك الصبح يا صاحبي يلا سلام …وخرج للبحث عن اى فندق لكى يبات فيه …
عند البيج بوص
البيج بوصه بعصبيه : ازاى بس البضاعه كلها راحت …اومال عيونا اللى فى الداخليه فين ..
أحد الأشخاص : الضابط المسئول زين
كان عامل خطط بديله دا غير أنه العمليه كانت فى سريه تامه ومقدرناش نحدد هو مرتب لايه …
البيج بوص : هى جدور عائله الملاح دى مش هتخلص …قدرنا نخلص من نادر زمان من غير ما حد يعرف بوجودنا …بعد السنين دى كلها ..يطلع لينا ابنه !!! ..بقلم منال عباس
فى صباح يوم جديد على أبطالنا
تستيقظ سيليا وتقوم بفزع : يا خبر انا اتأخرت …وتقوم بسرعه لتصلى فرضها وتستبدل ثيابها وتخرج لتقابلها ياسمين
ياسمين : رايحة فين يا بنتى ربنا يهديكى ..انتى لسه تعبانه
سيليا : ما ينفعش يا ماما فى حالات كتير .دا غير اللى عملت ليه العمليه لازم اطمن عليه وقبلتها وخرجت بسرعه دون انتظار اى رد منها ..
ياسمين : ربنا يصلح حالك ويهدى سرك يا بنت قلبي …