اخت جوزى منى السيد الثاني والاخير
الحاج جابر قام وقف فجأة، ورزع كف إيده على ترابيزة المكتب برنة هزت الحيطان، وبص لطارق ومروة بنظرة احتقار عمري ما شوفت زيها بس! اخرسوا خالص! قلة أصل وخسة وندالة، جاي تضحك عليا وعلى بنتي وتعمل نفسك شقيان وشاريني، وأنت سارق شقا مراتك وواكل حق عيالك ونازل تتجوز عليهم بفلوس أهلها؟ والله ما فيك ريحة الرجولة، ولا أختك شافت ريحة التربية!
بص الحاج جابر لبنته هناء وقالها بحزم امشي قدامي يا هناء.. اطلعي برة.. دي عيلة متدخلش بيوتنا ولا يتشرف بيهم حد، ده إحنا ربنا نجانا من مصيبة سودة كان هيلبسنا فيها!
هناء لمّت شنطتها وبصت لطارق وهي بتبصق على الأرض جنبه خسارة فيك البدلة اللي لابسها، ربنا ينتقم منك ومن أختك الحرباية دي.. روحي يا شيخة منك لله إنتِ وأخوكي!
خرج الحاج جابر وبنته والشهود اللي معاهم، ورزعوا وراهم الباب، وسابوا الأوضة تلف بطارق ومروة.
المأذون قفل دفتره بهدوء، وشال نضارته، وبص لطارق بجمود اتفضلوا يا حضرات.. المكتب هنا بيعقد الجواز الشرعي مش بيستر على النصب وتضييع حقوق الولايا. اتفضلوا برة.
مروة كانت واقفة في نص الأوضة مشلولة، فستانها النبيتي اللي كانت فرحانة بيه بقى شبه كفن، والميكب ساح من العرق والغيظ، بتبص لطارق اللي كان قاعد حاطط وشه بين رجليه وبيبكي زي العيل الصغير.
بصيت لطارق، ومكنش في قلبي نقطة شفقة واحدة. القهر اللي شوفته على مدار شهور، والإحساس بالعجز وإني ست رخيصة ومبهدلة ومهملة، كل ده اتحول لحجر تقيل رميته فوق قلبه العلبة اللي في جيبك دي يا طارق.. هاتها.
رفع عينه وهو بيشهق سمر.. أنا.. بقولك هاتها بالذوق، بدل ما أفتح الباب وألم عليك الشارع والمترو كله وأقول حرامي سارق دهب مراته وبيهرب بيه!
مد إيده برعشة، وطلع العلبة القطيفة الحمرا من جيب جاكيته، وحطها في إيدي وهو وشه في الأرض مش قادر يرفع عينه في عيني. فتحت العلبة قدام عين مروة، وطلعت الكارت لأغلى واحدة دخلت حياتي.. هانت وهنكون سوا.
قطعت الكارت نصين، ورميته في وش طارق هانت فعلاً يا طارق.. بس الجملة دي كانت ليا أنا ولعيالي.. هانت وهرتاح من وشك ومن قرفك للأبد. الطقم ده أنا هاخده، هعتبره جزء من مؤخري ومن نفقة عيالك اللي استخسرتها فيهم، وإيصال الأمانة ده هيفضل في إيد المترو رشوان.. لو حاولت تقرب من الشقة، أو تبطل تدفع نفقة حمزة ونور كل أول شهر بالمليم، الوصل هيتحرك في النيابة وساعتها مش هتشوف الشمس تلات سنين.