لعبة الخداع
لعبة الخداع
سلوى كانت قاعدة في اوضة ايات صاحبتها الانتيم من ايام ثانوي، ايات بتعيط ودموعها نازلة زي المطر وماسكة موبايلها بايديها اللي بتترعش، بتقولها يا سلوى انا حاسة ان ادم بيتغير عليا، بقاله اسبوعين بيرد متأخر وكلامه بقى بارد ومش زي الاول خالص، انا خايفة يكون بيخوني او زهق مني، سلوى بصلتها وهي متغاظة جدا لانها بتحب ايات اكتر من اختها وبتعتبرها توأم روحها، قالت لها يا بنتي اهدي بس، ادم ده انا من الاول مش مرتاحاله وكنت بقولك بلاش منه بس انتي اللي صممتي، بصي احنا هنعمل حركة نجيب بيها اخره ونعرف هو تمام ولا شمال.
ايات مسحت دموعها وقالت يعني هنعمل ايه، سلوى قامت وقفت وبدأت تمشي في الاوضة رايح جاي وهي بتفكر، قالت لها بصي احنا هنعمل اكونت فيك، بنت جامدة موت وشيك وصورها اجنبية كده محدش يعرفها، وادخل اكلمه على اني معجبة بيه واشوف هيقع ولا لا، لو طلع محترم وصدك يبقى خلاص نطمن، لو طلع خاين ووقع يبقى نفضحه ونخلص منه، ايات في الاول اترددت وقالت لا يا سلوى بلاش الحركات دي انا مش عايزة اخسره، بس سلوى اقنعتها وقالت لها يا هبلة احنا بنختبره عشان مصلحتك، لو بيحبك بجد مش هيبص لغيرك حتى لو ملكة جمال العالم كلمته.
وفعلا في نفس اليوم بالليل سلوى روحت بيتها وفتحت اللابتوب بتاعها وعملت اكونت جديد على الانستجرام، سمت نفسها حبيبة، حطت صور لبنت اجنبية شقرا عيونها خضرا وشكلها رقيق جدا وبرئ، وكتبت في البايو كلام انجليزي كده يدي ايحاء انها بنت كلاس وبتدرس في الجامعة الالمانية، وقعدت تظبط الاكونت كأنه حقيقي، نزلت كام صورة وكام ستوري وبدأت تعمل فولو لناس كتير عشان الاكونت يبان طبيعي، وبعدها دخلت تدور على ادم.
ادم كان ولد وسيم وطويل وعيونه عسلي وشعره اسود ودايما لابس شيك، كان في هندسة سنة رابعة، معروف عنه انه محبوب واجتماعي وبيهزر كتير، بس سلوى عمرها ما حبته وكانت دايما شايفة انه بتاع بنات وانه مش جد، اول مرة شافته في عيد ميلاد ايات كانت حاسة انه بيبص للبنات التانية اكتر ما بيبص لايات، ومن ساعتها وهي مش طايقاه.
سلوى بعتت لادم رسالة من اكونت حبيبة، كتبت له هاي انا شوفتك في كافيه في الزمالك وانت قاعد مع صحابك وعجبتني جدا، ممكن نتعرف، ادم شاف الرسالة بعد ساعة ورد عليها، قالها اهلا وسهلا طبعا ممكن نتعرف، انتي مين، سلوى قلبها دق بسرعة وقالت بس كده من اول رسالة وقع، بس قالت لنفسها لا استني نشوف اخره ايه، وبدأت ترد عليه بدلع وبكلام رقيق، تقوله انها معجبة بشخصيته وانه باين عليه انه طيب وحنين.
