بيت اهلى صافى هانى الثالث والاخير
لكن النهارده مش محتاجة أي دليل
هو بنفسه اعترف بكل حاجة
أبويا أخد الملف وقلب أول صفحة
وفجأة وقف عند مستند معين
ملامحه اتغيرت
وبص لباسم وقال
إيه ده
أنا قربت أبص
كان كشف حساب بنكي قديم
وفي آخر صفحة تحويل كبير جدًا خارج حسابي
بتاريخ من سنة ونص
بمبلغ عمري ما شفته قبل كده
خمسمية ألف جنيه
رفعت عيني لباسم وأنا مصدومة
وقلت
أنا عمري ما كان في حسابي المبلغ ده…
إزاي خرج باسمي؟
وساعتها باسم غمض عينيه وقال جملة خلت قلبي يقف مكانه
لأن الحساب… ماكنش باسمك لوحدك.الجملة وقعت عليا كأنها صدمة
قلتله وأنا مش مستوعبة
إنت بتقول إيه
رفع عينه بالعافية وقال
بعد الجواز بشهور قلتلك نمضي شوية أوراق عشان البنك يحدث البيانات
فاكرة
افتكرت اليوم ده
كنت راجعة من الشغل مرهقة
وهو حط قدامي كذا ورقة
وقاللي
دي إجراءات عادية
أنا حتى ماقريتش كل ورقة
كنت بثق فيه ثقة عمياء
أبويا مد إيده وقال
هات المستند
باسم طلع ملف صغير من شنطته
الظابط أخده وسلمه لأبويا
أبويا فضل يقلب فيه دقيقة كاملة
وبعدين قال
الحساب بالفعل كان عليه تفويض في فترة معينة
لكن…
باسم رفع راسه بسرعة
لكن إيه
أبويا كمل
التفويض ده اتلغى من أكتر من سنة
يعني من وقتها إنت مالكش أي حق تتصرف في الحساب
ساعتها باسم اتوتر أكتر
وقال
أنا… أنا افتكرت إنه لسه شغال
أبويا رد بحزم
ماحدش بينسى إذا كان ليه حق في حساب فيه مئات الآلاف
الظابط سأل
طيب والتحويل اللي قدامنا ده
أبويا قرب الورقة من النور
وقال
التحويل ده خرج بعد إلغاء التفويض بشهرين
يعني محتاج نعرف خرج بإذن مين
أنا حسيت إن في حاجة مش راكبة
لأن البنك عمره ما كان يسمح بحاجة زي دي
قلت
أنا ماوصلنيش أي رسالة
ولا أي إشعار
أبويا بصلي وقال
إنتِ غيرتي رقم موبايلك وقتها
افتكرت فعلًا