عن العشق والهوى نونا المصرى الاول
في تلك اللحظة اشار ادهم الى كمال ليتحدث عوضاً عنه فقال : دا نادراً ما يحصل بس لو حصل هتبقى النتيجة نفسها يعني هنزيد مرتب المبرمجين وهنظم مواقعهم للمواقع الرئيسية.
فابتسمت مريم وقالت باندفاع وكأنها نسيت نفسها : بتسموا دي مسابقة ، دي هتبقى سهلة اوي زي ما تكون لعبة عيال.
وبعد ان صرحت بذلك نظر الجميع اليها بصدمة مما جعلها تدرك ما قالته لذا وضعت يدها على فمها بسرعة اما ادهم فرفع حاجبة وقال بهدوء مميت : مريم مراد عثمان….انتي شايفه ان الموضوع دا لعبة عيال بالنسبة لك ؟
ارتبكت مريم كثيراً وقالت بتلعثم : لا…انا بس… كنت…
فقاطعها ادهم بصوت تغلب عليه الحدة والجبروت : لما انتي مش عارفه تجاوبي على سؤال صغير زي دا يبقى ازاي اتجرأتي وقلتي ان المسابقة دي هتبقى زي لعبة العيال ؟
ابتلعت مريم ريقها ونظرت اليه بتوتر شديد ثم غمغمت بنبرة مرتجفة : انا….
صاح بها ادهم بنبرة حادة : انتي ايه ، اتكلمي !
~ الفصل الثالث ~
﴿بِسْمِ اللهِ الرَّحْمنِ الرَّحِيمِ﴾
أرتعشت مريم بشدة عندما صرخ عليها ادهم السيوفي امام جميع الموظفين وتكومت الدموع في عيونها ولكنها لم تبكي بل سيطرت على نفسها ونظرت اليه مباشرةً بنظرات ثقه ثم قالت : انا مستوايا اعلى من كدا بكتير.. يعني المسابقة اللي اقترحتها حضرتك هتبقى سهلة جداً بالنسبه لي علشان كدا قلت انها هتبقى زي لعبة العيال ومكنش قصدي اني اتريق ابداً .
عاد ادهم الى بروده المميت وكتف يداه ثم قال : بقى كدا… تمام يا انسه ، بما ان مستوى حضرتك اعلى من كدا بكتير وان المسابقة السهلة دي هتبقى زي لعبة العيال بالنسبه لك فانتي هتستبعدي من المشاركة فيها وهتفضلي تشتغلي في مراجعة البيانات والمعلومات لغاية ما الشهر المحدد للمسابقة يعدي .
في تلك اللحظة اتسعت عينا مريم عندما سمعت ذلك واحتجت قائلة : بس دا ظلم … حضرتك هتظلمني بالطريقه دي.
فقال ادهم بنبرة يملؤها التحدي : لو مش عاجبك النظام هنا تقدري تقدمي استقالتك وتروحي تشتغلي في شركة تانيه بس لازم تدفعي الشرط الجزائي الاول .
قال ذلك ثم نظر إلى باقي الموظفين واضاف بصوت عالٍ وبنبرة حاسمة : الاجتماع دا انتهى.
– نهض الموظفين بتوتر وانتظروه حتى خرج من قاعة الاجتماعات وخلفه كمال وبعدها بدأوا يخرجون واحداً تلو الاخر…اما هي فوقفت مكانها وضغطت على قبضتها بشدة ؛ اقتربت منها صديقتها الهام وسألتها بعتب : عملتي كدا ليه يا مريم ، كان لازمته ايه كتر الكلام ؟