قدر الشاهين شهد الشورى الثانى
الفصل الثاني قدر الشاهين بقلمي شهد الشورى
فضلت قدر واقفة مكانها كام ثانية جسمها كله بيرتعش وعينيها بتتنقل بين أبوها وبين شاهين كأنها بتحاول تلاقي مخرج واحد بس من الكابوس اللي وقعت فيه فجأة
كانت لسه من شوية عروسة مستنية اليوم ده من زمان اليوم اللي كل بنت بتحلم بيه وكانت متخيلة نفسها وهي داخلة القاعة جنب حبيبها وسط الزغاريد والفرحة والضحك لكن دلوقتي……
دلوقتي واقفة بفستانها الأبيض قدام راجل عمرها ما تخيلت في يوم إنها ممكن تبقى مراته راجل هي بنفسها رفضته ورفضته بإرادتها وانهارده بقى هو الاختيار الوحيد اللي فاضل قدامها
مسحت دموعها بعنف وقالت بصوت مخنوق :
انا مش هتجوزه
رفع أبوها عينه ليها وصوته خرج مكسور لأول مرة في حياته : قدررر !!
بصتله وأول ما شافت الانكسار في عينيه قلبها وجعها أكتر
قربت منها أمها خطوة ودموعها بتنزل وهي بتقول برجاء :
يا بنتي أنا مش عايزة أظلمك والله ما عايزة بس شوفي اللي حصل شوفي الناس بره وشوفي جدك حالته عاملة إزاي إحنا هنتفضح وسط الناس
قاطعتها قدر بانهيار :
وأنا يا ماما ؟؟
سكتت أمها، وقدر كملت وهي حاطة إيدها على قلبها :
أنا مين هيفكر فيا ؟
أنا اللي اتسابت يوم فرحي أنا اللي اتكسرت واتفضحت قدام الناس ليه أنا اللي لازم أشيل كل ده
ليه أفكر في الناس والناس هما أول حد هينهشوا فيا
محدش هيراعيي إني مظلومة واني اتغدر بيا
شهقت وهي بتبص ناحية شاهين :
ليه أتجوز شيطان زي ده
الكلمة الأخيرة وصلت لشاهين بوضوح بصلها بهدوء من غير ما يحاول يقاطعها أو حتى يبين إنها استفزته بينما محمد غمض عينه بألم وقال بصوت متحشرج :
أنا آسف يا بنتي لأول مرة في حياتي مش عارف أحميكي
انهارت دموع قدر أكتر
الجملة دي بالذات كانت أقسى عليها من كل اللي اتقال
أبوها الراجل اللي طول عمرها شايفاه أقوى راجل في
الدنيا واللي كانت متأكدة إنه عمره ما هيسمح لحد يكسرها واقف قدامها عاجز ومش عارف يعمل حاجة
جدها جوه حالته الصحية بتتدهور أمها منهارة
أهل البيت كلهم على أعصابهم والناس بره مستنية تشوف بعينيها وتتأكد من الكلام اللي انتشر بعد ما بنت خالتها دخلت عليهم من بره وهي مرعوبة وقالت :
