قدر الشاهين شهد الشورى الثانى

الناس بره بيقولوا إن حسام هرب وسابها عشان أخلاقها مش كويسة وان…..

سكتت ومقدرتش تكمل

بس محدش كان محتاج يسمع الباقي الكل فهم وامها قربت منها أكتر وهي بتبكي :

فكري في أختك يا قدر مصيرها هيبقى إيه لو اتفضحنا انهارده مين هيتجوزها بعد كده وانتي مين هيتقدملك تاني أبوكي وأنا وأخوكي هنرفع راسنا في وش الناس إزاي

احنا كلنا هنتفضح يا بنتي

هزت راسها وهي بتبكي بحرقة :

لازم واحد فينا يضحي

الكلمة نزلت على قدر كأنها خدت قلم قاسي على وشها “واحدة فينا يضحي”

كأن حياتها هي الحاجة الوحيدة اللي ينفع تتقدم قربان عشان الباقيين يعيشوا كانت قربت تنهار تمامًا لولا إن صوت شاهين قطع الكلام وقال :

عايز أتكلم مع بنتك شوية يا أستاذ محمد لوحدنا

اتردد محمد وكان واضح إنه عايز يرفض لكن شاهين كان أسرع قرب من قدر ومسك إيدها وسحبها ناحية أوضة جانبية حاولت تفلت إيدها منه وهي بتقاومه :

سيب إيدي !!

دخل بيها الأوضة وأول ما قفل الباب ساب إيدها فورًا

رجعت قدر خطوتين لورا وبصتله بغضب وكره

بينما هو وقف قدامها بكل هدوء وكأن اللي بيحصل ده كله مش فارق معاه وقال ببرود :

اهدي كده واسمعي اللي هقوله عشان مش هعيده تاني

سكت لحظة وبص في عينيها مباشرة وكمل بجبروت :

وافتكري كويس خلاصك إنتي وأهلك في إيدي

صرخت عليه بغضب :

انت اللي عملت كل ده عشان تلوي دراعي وأقبل بيك

ابتسم شاهين بسخرية وهو بيطلع علبة السجاير من جيبه وولع سيجارته على مهله :

فين لوي الدراع ده وهل أنا فرضت نفسي عليكي وقولتلك لازم تتجوزيني….؟؟

بص لها بنظرة باردة وكمل كلامه :

انتي في مشكلة وأنا عرضت المساعدة وليكي كامل الحرية ترفضي وتختاري

ضحكت بمرارة :

مساعدة ؟؟

هز راسه وكمل بنفس الهدوء المستفز :

آه مساعدة بس قبل ما تختاري فكري شوية في اللي هيحصل بعد كده

قرب منها خطوة وقال :

الناس بره هتقول أكتر بكتير من اللي سمعتيه انهارده بيقولوا إن حسام هرب وسابك واخترعوا سبب بكره هيزودوا سبب تاني من دماغهم

سحب نفس من سيجارته وقال :

وأبوكي هيعمل إيه لما الكلام يكبر ولما الناس تبدأ تقول إن الواطي اللي فضلتيه عليا سابك عشان عرف إنك ماشية مع غيره أو إنه مش أول راجل في حياتك ويبتدوا يخترعوا حكايات من عندهم….