زعيم المافيا والسكرتيرة
مريم ضحكت بعدم تصديق.
نعم؟
لو محتاجة أي حاجة خلي حد يجيبها.
وليه؟
سليم بصلها.
عشان أنا بقولك.
هنا مريم اتعصبت.
لأ.
اتجمد.
يمكن محدش قال لسليم المنشاوي لأ بالطريقة دي من سنين.
مريم وقفت.
أنا
موظفة عند حضرتك من تسعة لخمسة. مش واحدة من رجالتك عشان تديني أوامر في حياتي.
مريم، الموضوع مش…
من بعد العشا وحضرتك بتتصرف كأنك مسؤول عني.
وأنا فعلًا…
وقف.
هي استنت تكملة الجملة.
لكنه سكت.
حضرتك إيه؟
قال بهدوء
لما أرجع هفهمك.
وخرج.
بعد ساعتين…
مريم عملت بالضبط عكس كلامه.
خرجت.
مش عناد.
والدتها اتصلت وقالت لها إن والدها تعبان شوية، ومريم قررت تروح تطمن عليه.
ركبت عربيتها.
وبعد عشر دقايق لاحظت عربية رمادي وراها.
في الأول مفتكرتش حاجة.
لفت يمين.
العربية لفت.
دخلت شارع جانبي.
العربية دخلت.
قلبها بدأ يدق.
زودت السرعة.
العربية زودت.
طلعت موبايلها.
أول اسم جه في دماغها…
سليم.
اترددت.
وبعدين اتصلت.
رد من أول رنة.
أيوه.
أستاذ سليم…
مجرد ما سمع صوتها قال
إنتِ فين؟
في عربية ماشية ورايا.
صوته اتغير.
لونها إيه؟
رمادي.
رقمها؟
بصت في المراية.
قالت الأرقام.
سكت ثانية.
ثم قال بصوت حاد
مريم، اسمعيني كويس. متقفليش المكالمة.
أنا خايفة.
أول مرة يسمعها تقولها.
وسليم حس قلبه اتقبض.
مش هيحصلك حاجة.
أعمل إيه؟
كملي على الطريق الرئيسي. متدخليش أي شارع جانبي.
سمعت صوته بيقول لحد جنبه
فارس، اتحرك.
ثم رجع لها.
أنا جاي لك.
بعد سبع دقايق، مريم شافت عربيتين سودا ظهروا فجأة.
واحدة دخلت بينها وبين العربية الرمادي.
والتانية عدتها بسرعة.
العربية الرمادي حاولت تلف.
لكن الطريق اتقفل قدامها.
مريم سمعت سليم
كملي.
وإنت فين؟
قدامك.
وبالفعل…
بعد أقل من دقيقة شافت عربيته.
وقف على جنب.
اركني ورايا.
ركنت.
نزلت من العربية بسرعة.
سليم كان نازل من عربيته.
أول ما شافته راحت ناحيته.
إيه اللي بيحصل؟!
بص عليها من فوق لتحت كأنه بيتأكد إنها سليمة.
حد قرب منك؟
لأ.
خبط عربيتك؟
لأ.
شوفتي وش حد؟
لأ!
وبعدين انفجرت
ممكن بقى تفهمني؟!
سليم سكت.
مين دول؟ وليه بيتبعوني؟ وإزاي رجالتك ظهروا بالسرعة دي؟
مريم وقفت فجأة.
بصتله.
إنت كنت مراقبني؟
سليم مردش.
وشها اتغير.
يا نهار أبيض.
مريم…
إنت حاطط ناس ورايا؟
حراسة.
من غير إذني؟!
كان لازم.
كان لازم تقولي!
