قصة ايمان حكايات منال عباس

طارق قاله طب شغلني في أي حاجة حتى أمن على الباب

الأستاذ كمال قاله أمن مينفعش يبقى حرامي أنت كنت بتسرق كراتين الشيبسي من المخزن والكاميرات جايباك

طارق طلع من الشركة وهو بيجرجر رجليه وراح قعد على قهوة في الحصري يشرب شاي ب 10 جنيه ومش معاه تمنه

في نفس الوقت أنا كنت حامل تاني من ياسين في الشهر التالت

الدكتور قالي المرة دي لازم راحة تامة عشان ضغطك لسه عالي

ياسين خدني من إيدي وقالي شغلك خلص لحد ما تولدي وتقومي بالسلامة أنا هصرف على البيت ومش عايزك تشتغلي

أم ياسين قالتلي هاتي هدومك وتعالي اقعدي معايا في شقتي لحد ما تولدي أنا هخدمك زي بنتي

وفعلا روحت قعدت معاها وكانت كل يوم الصبح تعمل لي بيض بلدي ولبن وتقولي كلي يا بنتي عشان البيبي

وفي يوم وأنا قاعدة معاها في البلكونة لقيت طارق معدي من تحت البلكونة شايل شوال بلاستيك بيلم فيه كانزات من الزبالة

شافني بصلي بعينه مكسورة وبعدين وطى راسه وكمل لم كانزات

أم ياسين قالتلي شايفة يا بنتي ربنا عمل فيه إيه كان بيقول عليكي عالة دلوقتي هو اللي بقى عالة على الناس كلها

بعدها بيومين جالي تليفون من مستشفى الجامعة الممرضة بتقولي يا مدام إيمان في واحد اسمه طارق جايب أمه الست أم طارق تعبانة عندها جلطة ومحتاجين حد من أهلها يمضي على العملية

قلت لها أنا مش من أهلها

قالتلي هو بيقول إنك مراته السابقة ومفيش حد غيرك

لبست عبايتي ونزلت جري على المستشفى لقيت أم طارق نايمة على ترولي في الاستقبال وطارق واقف جنبها بيعيط ومش معاه حتى حق الأشعة

أول ما شافني جري عليا وقالي الحقينا يا إيمان أمي بتموت

دخلت للدكتور وقلت له اعمل اللازم يا دكتور وأنا هدفع

الدكتور قالي العملية هتتكلف 8000 جنيه

قلت له اعملها وأنا هتصرف

كلمت ياسين جه بسرعة ومعاه الفلوس دفعهم وقال للدكتور اعمل العملية وربنا يشفيها

أم طارق دخلت العمليات وطارق قاعد بره على الأرض حاطط راسه بين إيديه

ياسين قعد جنبه وقاله قوم اتوضى وصلي ركعتين لله بنية إن أمك تقوم بالسلامة

طارق قام اتوضى وصلى لأول مرة من 3 شهور

بعد ساعتين الدكتور طلع وقال الحمد لله العملية نجحت بس محتاجة رعاية شهر

طارق قالي هاخدها فين أنا معنديش بيت

قلت له هاتها تقعد في شقتي القديمة اللي فوق السوبر ماركت لحد ما تخف وأنا هبعت لها أكل كل يوم