مراد
الكلام نزل على
مراد زي الصاعقة، يعني إيه، يعني هو كان عايز يسيبها بجد، طب ليه أسمهان بتحاول ترجع كل حاجة كأن مفيش حاجة حصلت، روح البيت وهو دماغه هتفرقع، فتح موبايله القديم اللي أمه كانت شايلاه من ساعة الحادثة، الموبايل كان مقفول بقاله فترة، فتحه وقعد يقلب في الشات، شات أسمهان كله حب وكلام حلو لحد قبل الحادثة بشهرين، بعد كده بدأ يتغير، رسايله بقت قصيرة وباردة، وهي بتسأله مالك، فيك إيه، أنت متغير ليه، وهو يرد معلش مشغول، نايم، في الشغل.
لحد ما وصل ليوم قبل الحادثة بيوم واحد، لقى شات بينه وبين أسمهان طويل، هي بتقول له أنت بقالك كتير بتهرب مني، لو مش عايزني قولها في وشي، وهو كاتب لها أنا فعلا محتاج نتكلم، أنا مش قادر أكمل وأنا حاسس إني بظلمك و بظلم نفسي، أنا مش مرتاح، تعالي نتقابل بكرة نتكلم بالراحة، وهي ردت عليه وقالت له أنت بتهزر صح، يعني إيه مش قادر تكمل، وبعدين سابوا بعض من غير ما يتفقوا على معاد، وتاني
يوم حصلت الحادثة.
مراد حس إن الدنيا بتلف بيه، يعني هو كان رايح يقول لها إنه عايز يسيبها، والحادثة حصلت قبل ما يلحق يقولها، ودلوقتي هي بتحاول ترجع واحد مش موجود أصلا، واحد كان مقرر يمشي.
في نفس الوقت كان في بنت تانية بتظهر في الشات كتير، اسمها ميار، زميلته في الشغل الجديد اللي هو مش فاكره، ميار كانت بتبعت له ميمز وبتضحك معاه، وكلامهم كان خفيف ومريح، مفيهوش ضغط الخطوبة، آخر رسالة بينهم كانت قبل الحادثة بيومين، ميار كاتبه له ها هتعمل إيه، ومراد كاتب لها مش عارف بس لازم أبقى صريح معاها، مينفعش أكمل وأنا مش مبسوط.
مراد قرر يواجه أسمهان، لما جت بالليل كالعادة ومعاها علبة شوكولاتة كان هو بيحبها زمان، قال لها اقعدي يا أسمهان عايز أتكلم معاكي، أنا عرفت كل حاجة، عرفت إني كنت عايز أسيبك قبل الحادثة بيوم، أسمهان وشها شحب وقالت له مين قالك الكلام ده، شذى، قال لها مش مهم مين قالي، المهم إن ده حصل، أنا لقيت الشات، أنتي ليه مقولتليش، ليه بتعملي كأني لسه بحبك.
أسمهان انفجرت من العياط وقالت له عشان أنا بحبك يا مراد، عشان أنا عارفة إنك كنت مضغوط بس، الشغل الجديد وضغط أهلك وضغط الخطوبة، أنت مكنتش عايز تسيبني أنت كنت تايه، وكنت عارفة إنك لو هديت هترجع، وبعدين الحادثة حصلت وقولت دي فرصة، فرصة نبدأ من جديد من غير خناقات،
