ف شارع من شوارع شبرا

الخناقات دي كانت يومية لحد ما في يوم كبير حصلت خناقة كبيرة بين الحاج اشرف والحاج محمد على مدخل البيت عشان الحاج محمد ركن العربية بتاعته قدام مدخل بيت الحاج اشرف والحاج اشرف قاله انت بتركن هنا عندا فيا ولا ايه يا محمد فقاله شارع الحكومة يا اخويا مش شارع ابوك فقاموا مسكوا في بعض والستات طلعت تصوت ونورا نزلت تشد ابوها واسماء بتعيط واسلام وايمان نزلوا يشدوا ابوهم والشارع كله اتلم والموضوع كبر اوي ودخل فيه قسم الشرطة كمان

بعد الخناقة دي بيومين كانت نورا قاعدة على السلم بتاع البيت بتعيط لوحدها عشان سمعت ابوها بيقول لامها انا تعبت من المشاكل دي نفسي ارتاح بقى قبل ما اموت وهي اتوجعت اوي وفي نفس اللحظة كان اسلام طالع بالصدفة شايل كيس سوبر ماركت فشافها بتعيط فوقف واول مرة في حياته ميرخمش عليها سألها بجد مالك يا نورا فيه ايه فهي مسحت دموعها بسرعة وقالتله ملكش دعوة انت مالك ومالنا فقالها يا ستي انا غلطان اني سألت حقك عليا ومشي خطوتين وبعدين رجع قالها على فكرة ابويا هو كمان تعبان من الخناق ومش عارف ينام من الضغط

الجملة دي خلت نورا تفكر طول الليل وتاني يوم الصبح وهي رايحة الكلية قابلت اسلام عند اول الشارع وكان لوحده فقالتله استنى يا اسلام عايزة اقولك حاجة فهو وقف مستغرب قالها خير يا نورا هتديني محاضرة عن الادب ولا ايه فقالتله لا والله انا بفكر بجد احنا هنفضل لحد امتى كده اهالينا هيموتوا بعض واحنا واقفين نتفرج فقالها عندك حق بس هنعمل ايه يعني نروح نقولهم اتصالحوا هيقولولنا اطلعوا منها يا عيال

فقالتله بص انا عندي فكرة مجنونة شوية بس ممكن تجيب نتيجة قالها فكرة ايه قالتله احنا نمثل اننا بنحب بعض اه والله زي ما سمعت كده نمثل اننا مرتبطين وبنحب بعض بجد فاهالينا هيتضطروا يسكتوا عشان الفضيحة وعشان الشارع ومرة واحدة هيبطلوا خناق غصب عنهم وبعدها بشوية نقول اننا اكتشفنا اننا مش مناسبين لبعض ونسيب بعض والدنيا تهدى

اسلام فضل متنح شوية وبعدين انفجر ضحك وقالها انتي مجنونة يا بنتي انتي عارفة لو ابويا عرف اني بحب بنت اشرف ممكن يعمل فيا ايه ده ممكن يطردني من البيت فقالتله ما ده المطلوب يا ذكي لما يخافوا يخسروا عيالهم هيسكتوا فقالها طب ولو الفكرة فشلت فقالتله يبقى مخسرناش حاجة اهو بنحاول