سلفتى زهرة الربيع
@أبرز المعجبي
زهرة_الربيع
صلي على حبيب الله
بصيت لانتصار في عينيها للحظات وبعدين بصيت لحماتي وقلت بهدوء شديد:
“سمعت يا حماتي… وسمعت كل كلمة. بس قبل ما تحكمي عليا، ممكن تسمعيني للآخر؟”
حماتي عقدت حواجبها وقالت بعصبية:
“أسمع إيه؟! سلفتك بتقول إنك بتاخدي مناب تلاتة وتحطيهم في طبق وتطلعيهم لبنتك! يعني بتسرقي أكل البيت؟!”
انتصار دخلت بسرعة وقالت:
“أنا ما قلتش غير اللي شوفته بعيني يا حماتي، وأنا والله ما كان قصدي أعمل مشكلة.”
لفيت ناحيتها وابتسمت.
“طبعًا… ما كانش قصدك.”
قالتها وهي متحفزة:
“أيوه، ما كانش قصدي.”
قلت:
“طيب حلو أوي. بما إنك شفتي بعينيكي، يبقى أكيد شفتي باقي اللي حصل.”
وشها اتغير للحظة، لكنها تماسكت وقالت:
“شفته طبعًا.”
هزيت راسي وقلت:
“يبقى خلينا نفتكر سوا.”
حماتي قالت بعصبية:
“خديجة ما تلفيش وتدوري! قولي عملتي كده ولا لأ!”
قلت:
“أيوه يا حماتي، أنا فعلًا كنت باخد لحمة وأطلع بيها فوق.”
انتصار ابتسمت بانتصار وقالت:
“أهو!”
لكن قبل ما تكمل، رفعت إيدي وقلت:
“بس مش زي ما انتصار قالت.”
حماتي سكتت.
وانتصار ابتسامتها اختفت.
قلت:
“أنا كنت باخد الحتت اللي كانت بتفضلها انتصار بعد ما تاكل على النار.”
انتصار اتنفضت وقالت:
“إيه؟!”
قلت بهدوء:
“أيوه. كل مرة كنتي تطلعي حتة لحمة من الحلة وتاكليها، وبعدها لما تحسي إنك شبعتِ أو الحتة مش عاجباكي، كنتي تحطيها في طبق جنبك. وأنا كنت باخد اللي بتسيبيه وأطلعه لبنتي.”
حماتي بصت لانتصار بسرعة.
انتصار قالت:
“كدابة! أنا عمري ما عملت كده!”
ابتسمت وقلت:
“عشان كده أنا قلت إن عندي فكرة أحسن من الكلام.”
مديت إيدي لجيب جلابيتي وطلعت موبايلي.
حماتي قالت:
“إيه ده؟”
قلت:
“أنا كنت ساكتة يا حماتي، بس من كتر ما الموضوع اتكرر، وفي يوم بنتي دخلت عليا المطبخ فجأة وشافتني متضايقة، سألتني مالك. وقتها صورت جزء من اللي بيحصل عشان لو في يوم حد اتهمني بحاجة، يبقى عندي دليل.”
انتصار وشها اصفر.
قالت بسرعة:
“إنتي بتصوري الناس من غير إذنهم؟!”
قلت:
“أنا ما صورتش حد مخصوص. الموبايل كان على الرخامة وأنا بطبخ، والفيديو فيه الحلة والمطبخ وصوتك وإنتي بتقولي: استني بس أطلع الحتة دي أدوقها.”
حماتي قالت:
“هاتيه.”