بعد وفاة مراتى حكايات زهرة الاول
الممرضة شاورتلي على أوضة في آخر الممر، روحت وخبطت على الباب بإيد بتترعش.
“ادخل”.
فتحت الباب ودخلت.. كان راجل في أواخر الخمسينات، شعره أبيض ووقور، لابس البالطو الأبيض وقاعد وراه مكتب مليان ملفات طبية. أول ما شافني، قام وقف ومد إيده: “أستاذ مجدي؟ اتفضل استريح”.
قعدت على الكرسي وأنا بنهج ومش قادر ألم نفسي: “دكتور.. أرجوك متوجعش قلبي، نور فين؟ وإيه اللي حصل؟”.
الدكتور شريف قعد مكانه، وشبك صوابعه وبصلي بنظرة مليانة لوم وأسف في نفس الوقت: “نور بنتك.. من أشطر وأكفأ الطلبة اللي مروا عليا في الكلية، بنت محترمة ومجتهدة لأبعد حد.. من أربع شهور، نور جاتلي هنا المكتب وهي منهارة، طلبت مني أساعدها تلاقي سكن للطالبات وتشتغل في المستشفى نوباتجيات تمريض أو استقبال عشان تصرف على نفسها، وقالتلي إن ظروفها العائلية بقت مستحيلة ومش هتقدر تكمل غير كده”.
دموعي نزلت غصب عني ومسحتها بكم قميصي: “نور اشتغلت ممرضة؟ بنتي أنا تتبهدل البهدلة دي؟!”.
الدكتور كمل بنبرة صارمة: “يا ريتها وقفت عند البهدلة يا أستاذ مجدي.. البنت كانت بتواصل الليل بالنهار، تذاكر الصبح في الكلية، وبالليل تقف على رجليها في طوارئ القصر العيني عشان تاخد ملاليم تأكل بيها نفسها وتدفع مصاريف السكن اللي مأجراه مع بنات غُرب.. البنت كانت بتدبل قدامي، وشها شاحب ومبتاكلش، ورفضت تاخد مني أي مساعدة مالية، عزة نفسها كانت هتقت\لها”.
سكت شوية وبص في عيني مباشرة وقال الكلمة اللي شلت تفكيري:
“بس المصيبة مش هنا.. المصيبة إن إمبارح بالليل، حصلت كارثة في قسم الطوارئ.. أدوية غالية جدًا ومسكنات جدول أول مخدرة خاصة بالعمليات الكبرى اختفت من عهدة القسم اللي نور كانت مسؤولة عنه.. والمشرفة اللي ماسكة التمريض، ست مؤذية ومبتطقش نور عشان بنتك نضيفة ومبتسكتش على الغلط، لبست القض\ية كلها في نور.. والتحقيق شغال دلوقتي في إدارة الشؤون القانونية والمباحث، ونور محبوسة جوة مكتب الأمن وتحت حراسة، ولو ثبتت عليها التهمة، مش بس هتتفصل من الكلية.. دي هتدخل السجن بتهمة سرقة أدوية مخدرة والاتجار فيها!”.
قمت وقفت من مكاني زي الملدوع، والكرسي اتقلب ورايا: “سجن؟! بنتي أنا تدخل السجن وتتهم بالسرقة؟! مستحيل! نور متمدش إيدها على مليم حرام، نور دي متربية على الحلال ونضيفة زي البفته البيضا!”.
