زهرة لكن دميمه سلمى محمد الاول

عندما توقف كريم بالسيارة قرب البوابة… لحظ فتاة وشاب يتهجم عليها وهي تحاول الافلات

خرج مسرعا من السيارة… متحدثا بصوت عالي :في حاجة يا أنسة

نظرت له بتوسل : خليه يسبني

هتف كريم :سيبها…

احمد وجه له نظرات نارية :ملكش فيه… دي مشكلة بين حبيبين اش دخلك أنت

بادل كلاهما نظرة ذهول فهما مختلفان.. نقيضان… هو جذاب وهي عكسه تماما: حبيبين…

احمد قال بحدة : متخانقين مع بعض وهي مش قابله الصلح…

همست زهرة :امشي من هنا بلاش فضايح

رد عليها بخفوت :همشي بشرط… توافقي نتقابل

هزت رأسها بالموافقة متمته بخفوت :حاضر

نظر كريم لزهرة قائلا: كلامه صح هو انتو زي مابيقول

قالت بخفوت وهي تشعر بالغضب :أيوه صح.. أمشي بقا دلوقتي

هز رأسه بانتصار :حاضر… نتقابل بعد ماتخلصي شغل

ردت زهرة :حاضر

تحرك كريم مبتعدا مبتسما… متمتما… الناس فيما

يعشقون مذاهب

شعرت زهرة بالرعب عندما رأت هذا الراجل يتجه ناحية البوابة فتمنت عدم ملاحظتها…

… تفاجئ بمرور الفتاة أمامه…. تعبر بوابة الشركة

صاح فيها :أنتي يا أنسة رايحة فين و اسمك ايه

زهرة شعرت بأحراج شديد :انا شغاله هنا واسمي زهرة

تحدث بثبات :وشغالة ايه

ردت زهرة متمته:شغالة في البوفيه

تحدث له أمرا :اللي حصل دلوقتي ميتكررش تاني

هزت رأسها قائلة بخفوت :حاضر يابيه

_____

ذهب كريم مباشرة إلى مكتب بيسان

طرق على الباب ثم دخل مباشرة قائلا بابتسامة :صباح الخير

زمت شفتيها قائلة بضيق :فين الخير ده ياكيمو… انا خلاص جبت اخرى منه

جلس على الكرسي وهو يسأل :مالك مانتي كنتي كويسة امبارح

بيسان بغضب:كنت ياكريم كنت….

_ خير وإيه اللي جد من امبارح النهاردة

زفرت بحدة وهي تتحدث :البيه عمل نفسه ولا كأنه شايفني… عديت من جنبه ولا هان عليه يقولي صباح الخير

حاول كتم ابتسامته فقال بهدوء :والزوبعة دي كلها عشان مقلكيش صباح الخير

ردت بيسان : أه ازاي يشوفني وميقوليش صباح الخير… اتصرف ياكريم…. أنا خلاص تعبت ولو ملقتش ليا حل معاه هموت نفسي

كريم تحدث بانزعاج : إيه العبط اللي بتقوليه ده… احنا مش اتفقنا امبارح وقولنا هنفذ بعدين الفكرة

حركت يديها في الهواء بانفعال :أفكارك اللي كلها فاشلة ومش بتأثر… لمعت عينيها بالدموع وهي تتحدث….مفيش حد حاسس بيا… أنت متعرفش يعني ايه افضل اربع سنين برا وأقول لنفسي اكيد هنساه لما يبقى بعيد عني… ولا نسيته ولا زفت بالعكس حبه زاد جوا قلبي وهو قلبه حجر… انهمرت دموعها